Investimet e reja të projekt-buxhetit 2025/ Balluku: 80 mln euro për ujësjellës, impakt në 210 mijë banorë

Së shpejti në Kuvend do të nisin diskutimet për projekbuxhetin e vitit 2025. Zëvendëskryeministrja Belinda Balluku bëri me dije disa detaje lidhur me investimet madhore që do të parashikohen në sektorin e ujësjellës kanalizimeve.

“Investime që do të prekin 8 ujësjellësa të rinj dhe 6 struktura kanalizimeshe dhe trajtimit të ujërave të ndotura në të gjithë vendin. Këto investime kapin shifrën mbi 80 milionë eurove dhe do të impaktojnë më shumë se 210 mijë banorë” deklaroi Balluku.

Këtë deklaratë, zëvëndëskryeministrja e bëri nga Lezha, ku mori pjesë në ceremoninë e nisjes së punimeve për projektin Infrastruktura Bashkiake V, që parashikon ndërtimin e rrjetit të furnizimit me ujë për tre lagje, rehabilitimin e impiantit të ujërave të ndotura dhe ndërtimin e sistemit të ndarë të ujërave të bardha për të shmagur përmbytjet.

“Qëllimi i projektit është përmirësimi i situatës së furnizimit me ujë, gjithashtu si dhe rritjen e performancës së shoqërisë rajonale të Ujësjellës-Kanalizimeve në Lezhë. Duhet të kemi parasysh që vetëm dy vite më parë ne kemi nisur një proces reformues të thellë përsa i përket të gjitha shoqërive të ujësjellës-kanalizimeve të cilat kanë qenë deri para pak vitesh të alokuara pranë bashkive, por ndërkohë për shkak të reformës së thellë që ne kemi ndërmarrë, tashmë janë krijuar njësitë rajonale, ndërmarrjet rajonale, të cilat nga të gjithë treguesit që kemi pasur gjatë vitit 2023 dhe që do të kemi gjatë vitit 2024 padyshim tregojnë që kemi një mirëadministrim të këtyre ndërmarrjeve rajonale, duke ulur numrin e punonjësve dhe kostot të cilat krijohen për shkak të operimeve dhe nga ana tjetër duke rritur dhe optimizuar financat. Dhe padyshim e gjitha kjo reflektohet edhe në ofrimin e një shërbimi cilësor më të mire” deklaroi Balluku.

Referuar të dhënave që bëri publike zëvëndëskryeministrja, gjatë sezonit veror u prodhuan në zonat bregdetare 215 mijë metër kub ujë dhe u përpunuan në impiantet e trajtimit të ujërave të ndotura rreth 170 mijë metër kub ujë në ditë.

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.