Skenari për rritjen e pensioneve – Rama, bizneseve: Deklaroni pagat reale. Fillimisht rishikojmë bonusin

Elisabeta Dosku/Scan

 

Deklarimi real i pagave nga bizneset është skenari i vetëm për rritjen e pensioneve në vend. Kryeministri Edi Rama, në kuadër të aksionit kundër informalitetit, u ka bërë apel sipërmarrjeve të paguajnë sigurimet shoqërore sipas pagave reale, pasi në të kundërt do të përballen me penalitete të rënda deri në mbyllje të aktivitetit.

“Mesazhi duhet kuptuar që ne nuk do pranojmë deklarime pagash të cilat nuk i besojmë. Ndërtuesit që do deklarojnë 60 mijë lekë pagë, që nuk ekziston, duhet të kuptojnë që nuk do t’ju pranohet. Situata që mund të shkojnë deri në kolaps të kompanisë, për çfarë se nuk duan ti paguajnë haraçin pensionistëve. Merreni shumë seriozisht, se deklarimi i pagës do të jetë serioz dhe i vërtetë. Po shqyrtojmë dhe mundësinë që të publikojmë pagat me ligj, që të gjithë të shohin, kush paguan çfarë.”

Kryeministri theksoi se fillimisht do të rritet bonusi i fundvitit për pensionistët, dhe me deklarimet reale do të shikohet mundësia për rritjen e mëtejshme të pensioneve.

“Do u japim përgjigje hap pas hapi , ku bonusi do të ndryshojë si strukturë dhe pastaj hap pas hapi, që t’ju japim pensionistëve ato që i grabisin.  Për biznesin vogël që paguajnë vetëm sigurimet, është si të vjedhësh veten tëndë. Do marrim masa drastike për çdo biznes të vogël që nuk paguan sigurime shoqërore, deri në mbyllje”.

Kryeministri theksoi se pavarësisht lehtësive fiskale nga të cilat përfitojnë sipërmarrjet, ¼ e buxhetit të shtetit shkon për të mbuluar deficitin e skemës së pensioneve për shkak të mospagesës së sigurimeve shoqërore dhe shëndetësore.

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.