SHBA, më e varur nga lëndët djegëse fosile se Kina – Uashingtoni gjeneroi 62% të energjisë me këto burime në 4 muajt e fundit

Kristi Ceta/SCAN

 

Sipërmarrjet në Shtetet e Bashkuara janë mbështetur në lëndët djegëse fosile për të gjeneruar një pjesë më të madhe të energjisë elektrike se sa homologët e tyre në Kinë që nga qershori, duke hedhur poshtë pretendimet e SHBA-ve për të qenë një lider në përpjekjet e tranzicionit të energjisë.

Shërbimet e SHBA-ve janë mbështetur në lëndët djegëse fosile për të gjeneruar mesatarisht 62.4% të prodhimit total të energjisë elektrike për katër muajt e fundit, sipas të dhënave nga grupi i ekspertëve për energjinë Ember. Kjo shifër tejkalon 60.5% gjatë së njëjtës periudhë në Kinë, prodhuesi dhe ndotësi më i madh i energjisë në botë.

Varësia e lartë e SHBA-ve nga fosilet erdhi gjatë verës kur kërkesa e brendshme e energjisë elektrike u rrit ndjeshëm për shkak të përdorimit të kondicionerëve, ndërsa mbështetja relativisht më e ulët e Kinës në këto burime ka ndodhur gjatë një ngadalësimi të zgjatur ekonomik. Sidoqoftë, këto të dhëna theksojnë se sa më agresiv ka qenë Pekini në rritjen e prodhimit të energjisë së pastër.

Pa reduktime të shpejta në prodhimin e fosileve ose rritje të shpejtë të prodhimit të energjisë së gjelbër, SHBA rrezikon të mbetet prapa ekonomive të tjera të mëdha në përpjekjet për dekarbonizimin e sektorit të energjisë dhe të humbasë besueshmërinë si lider klimatik.

Në Shtetet e Bashkuara, prodhimi i energjisë elektrike të pastër ka qenë prioritet kryesor gjatë pesë viteve të fundit, me gjenerimin nga këto burime në rritje me rreth 16% që nga viti 2019, sipas Ember. Megjithatë, rritja e vazhdueshme e kërkesës totale për energji ka kufizuar hapësirën për firmat e energjisë për të shkurtuar prodhimin nga lëndët djegëse fosile. Në fakt, gjenerimi i lëndëve djegëse fosile gjatë nëntë muajve të parë të 2024-ës ra vetëm 0,8% krahasuar me të njëjtët muaj të vitit 2019.

Duhet theksuar se prodhimi me qymyr ka rënë me 34% që nga viti 2019 deri më sot. Por me rritjen e kërkesës totale për energji çdo vit, kompanitë e energjisë duhet të kompensojnë këtë rënie me prodhim më të lartë me gaz. Gjenerimi total i energjisë elektrike në SHBA është rritur me rreth 5.5% nga 2019 në 2024, pasi automjetet elektrike, qendrat e të dhënave dhe aplikacionet e inteligjencës artificiale rrisin konsumin e përgjithshëm.

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.