Sa dëme janë paguar nga shoqëritë e sigurimit? – Rritja e aksidenteve u përkthye në 26% më shumë dëme të paguara

Ledina Elezi/SCAN

 

Kompanitë e sigurimit kanë paguar gjithsej 6.1 miliardë lekë dëme në periudhën janar-shtator 2024, ku pjesa më e madhe e dëmeve të paguara bruto i përket sigurimit motorik. Sipas të dhënave më të fundit nga Autoriteti i Mbikëqyrjes Financiare, shoqëritë e sigurimit kanë paguar rreth 4.6 miliardë lekë për automjetet e përfshira në aksidente.

Pagesat e dëmeve janë rritur me 25.7% krahasuar me periudhën janar – shtator 2023. Numri i dëmeve të paguara është rritur me 7,336 duke arritur shifrën 53,561, nga të cilat 50,913 dëme janë paguar nga shoqëritë e sigurimit të jo-Jetës dhe 2,648 nga shoqëritë e sigurimit të jetës.

Duke qenë se numri më i madh i kontratave dhe primeve të shkruara bruto është regjistruar për sigurimet në kategorinë e jo-jetës, edhe vlera e dëmeve të paguara është më e lartë në aktivitetin e jo-jetës. Kështu, rreth 5.5 miliardë lekë dëme janë paguar për sigurimin motorik, të pronës dhe aktivitetet e tjera që nuk lidhen me jetën e individit, ndërkohë që vetëm 253 milionë lekë dëme janë paguar nga sigurimi i jetës.

Fakti që thuajse 74% e totalit të dëmeve të paguara bruto i takon sigurimit motorik është reflektim i shifrave të larta të aksidenteve përgjatë këtij viti. Të dhënat zyrtare nga INSTAT tregojnë se në 8 muaj janë shënuar gjithsej 1086 aksidente, gati 41% më shumë se vitin e kaluar. Vetëm gjatë muajit gusht kanë ndodhur 173 aksidente rrugore, një rritje me 48% llogaritur me gushtin e 2023-it.

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.