Koncesionet do marrin më shumë para’ – Buxheti 2025 arrin në 14.23 mld lekë, 0.23 mld lekë më shumë se sivjet 

Ola Mitre / SCAN

 

Kontratat koncesionare do të marrin më shumë para’ nga buxheti i shtetit për vitin 2025. Sipas projektbuxhetit, për vitin që vjen janë akorduar në total 14.23 mld lekë apo rreth 0.23 mld lekë më shumë se buxheti i vitit 2024, ku financimi për koncesionet ishte rreth 14 mld lekë.

Në total janë 10 kontrata që financohen, teksa peshën më të madhe të buxhetit të koncesioneve e ka ndërtimi i rrugës së Arbrit. Për këtë kontratë, në total për vitin 2025 janë akorduar 3.36 mld lekë. 2 kontratat e tjera në sektorin e rrugëve që do të financohen për vitin që vjen janë ato të autostradës Milot – Morinë dhe të aksit Porti i Jahteve –Orikum – Dukat, teksa buxheti total për koncesionet në sektorin e transportit rrugor arrin në rreth 5 mld lekë.

Ndërkaq, për vitin 2025 është parashikuar mbështetje buxhetore edhe për 4 kontratat koncesionare në fushën e shëndetësisë, ku përfshihet kontrolli shëndetësor bazë, i njohur ndryshe si check –up, sterlizimi i instrumenteve kirurgjikalë, ofrimi i shërbimeve laboratorike dhe koncesioni i hemodializës. Kontratat e partneritetit publik –privat në sektorin shëndetësor do të financohen në total, me një shumë prej 5.63 mld lekësh.

Paralelisht, buxheti i vitit që vjen parashikon edhe financimin e kontratës për ndërtimin e inceneratorit të Tiranës, me një vlerë prej 1.27 mld lekë. 2 kontratat e tjera që do të marrin para’ nga buxheti 2025 janë ato të infrastrukturës arsimore në Bashkinë Tiranë, si dhe kontrata e shërbimit të skanimit të dogana. Ndërkaq, 3 kontrata të tjera për ndërtim e inceneratorit të Elbasanti, Fierit dhe aksin Milot – Balldren, tashmë janë joaktive.

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.