Qytetarët e RMV, duhanpirësit më të mëdhenj në rajon – Rreth 46% e të rriturve janë konsumatorë, ndjeshëm mbi mesataren e BE

Kristi Ceta/SCAN

 

Qytetarët e Maqedonisë së Veriut janë deri tani konsumatorët më të mëdhenj të cigareve në rajon dhe në dhjetëshen e parë në botë.

Rreth 46% e të rriturve janë duhanpirës të cigareve, pa llogaritur ato elektronike dhe produktet e tjera të duhanit. Për krahasim, 18.4% e Bashkimit Evropian dhe 17% e popullsisë së botës janë konsumues duhani.

Sipas të dhënave, pothuajse një në dy duhanpirës në Maqedoni konsumon më shumë se një paketë cigare në ditë.

Vit pas viti, mosha në të cilën të rinjtë fillojnë të pinë duhan po zvogëlohet në mënyrë drastike. Mesatarja në Maqedoni ka shkuar 13 vjet e gjysmë vitet e fundit, një trend shqetësues në shoqëri. Hulumtimi nga analytica think tank tregon se duhani mund të çojë në 39 mijë vdekje në 40 vitet e ardhshme.

Sipas Organizatës Botërore të Shëndetësisë, çdo vit, më shumë se 8 milionë njerëz vdesin nga sëmundjet që lidhen me duhanin, duke përfshirë rreth 1.2 milionë vdekje që rezultojnë nga ekspozimi ndaj duhanit në ambientet e mbyllura.

Qytetarët e Maqedonisë së Veriut pinë cigaret më të lira në Ballkanin Perëndimor, pra një paketë ka kushtuar mesatarisht 2.4 euro vitin e kaluar. Llogaritë e akcizës janë 1.12 euro. Kjo situatë e bën duhanin më të arritshëm, duke ndikuar negativisht në shëndetin e popullsisë dhe duke vështirësuar përpjekjet për ta luftuar varësinë.

Në Maqedoninë e Veriut akciza është 56 euro për 1000 cigare, që është dukshëm nën rregullat në BE për 90 euro. Gjithashtu, Unioni do të shqyrtojë propozimin për rritjen e akcizës në 200 euro për 1000 cigare, që do të ndikojë në rritjen e ndjeshme të çmimit.

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.