“Të hiqen përjashtimet nga taksat” – “Detyrat” e KE. Progresraporti vlerëson progresin në fushën bankare dhe fiskale

Elisabeta Dosku/ SCAN

 

Progresraporti i Komisonit Europian për Shqipërinë del në konkluzion se vendi është mesatarisht i përgatitur në fushën e taksave dhe ka ende nevojë për reforma thelbësore.

Sipas dokumentit ,“është bërë përparim i kufizuar në periudhat e raportimit, në veçanti, në heqjen e skemës së stimulimit industrial. Kjo ka bërë që Shqipëria të hiqet nga lista e regjimeve tatimore potencialisht të dëmshme. Rekomandimet e Komisionit nga viti i kaluar janë zbatuar pjesërisht dhe mbeten kryesisht të vlefshme”. KE rekomandon se në vitin e ardhshëm, Shqipëria duhet të miratojë strategjinë afatmesme të të ardhurave, duke u përqendruar në qasjen për reduktimin e mëtejshëm të përjashtimeve nga taksat dhe përafrimin e normave të TVSH-së dhe akcizës me ligjet e BE-së.

“Thjeshtoni sistemin e taksave për të inkurajuar më tej pajtueshmërinë tatimore dhe për të përmirësuar përdorimin e të dhënave të palëve të treta në luftën kundër mashtrimit tatimor dhe evazionit fiskal.  Të fillojnë përgatitjet drejt arritjes së ndërlidhjes dhe ndërveprimit me të përbashkët me Sistemet e IT të taksave të BE-së”, thuhet në raport.

Po ashtu, në “sytë” e BE, Shqipëria pozicionohet midis një niveli të moderuar dhe të mirë përgatitjeje në fushën financiare dhe të shërbimeve. Dokumenti i Komisionit Europian për Shqipërinë, nënvizon se është bërë progres në përafrimin e mëtejshëm të legjislacionit me ligjet e BE-së në rimëkëmbjen bankare dhe kuadrin e zgjidhjes, si dhe për fondet private të pensioneve.

Megjithatë Komisioni Evropian konstaton se disa nga rekomandimet e vitit të kaluar janë implementuar dhe të tjera mbeten ende të vlefshme.  Kështu, në raport citohet se vitin e ardhshëm, Shqipëria duhet të vazhdojë punën për përafrimin e plotë të rregullores bankare me  ligjet e BE-së në tregjet e kapitalit, duke përfshirë tregjet e letrave me vlerë, fondet e investimeve dhe infrastrukturat e tregut financiar.

Sa i takon fushës ekonomike dhe politikës monetare, evidentohet se Shqipëria ka bërë progres, pasi Banka e Shqipërisë ruajti stabilitetin e çmimeve dhe është respektuar rregulli fiskal.  Në vitin e ardhshëm, rekomandohet që Shqipëria të përafrimi plotësisht i Ligjin për Bankën e Shqipërisë me ligjet BE-së; të fillojë raportimin mbi qëndrueshmërinë afatgjatë fiskale të sistemit të sigurimeve shoqërore; të harmonizojë legjislacionin dhe praktikat buxhetore të Shqipërisë me kërkesat e acquis të BE-së.

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.