“Agrovoltaika” u vjen në ndihmë fermerëve – Plotëson rreth 70% të kërkesës për energji në Evropën Qendrore

Kristi Ceta/ SCAN

Vendosja e paneleve diellore dhe kultivimi i të korrave në të njëjtën tokë mund të jetë një zgjidhje për të nxitur energjinë elektrike të rinovueshme në Çeki, Hungari, Poloni dhe Sllovaki, duke arritur 68% të kërkesës për energji në këto vende, sipas një studimi të ri.

Një studim nga grupi i ekspertëve energjetikë Ember parashtron se kombinimi i energjisë elektrike dhe prodhimit të bimëve, një praktikë e quajtur agrovoltaikë, në vetëm 9% të tokës bujqësore mund të plotësojë nevojat për energji elektrike të bujqësisë dhe përpunimit të ushqimit në rajon.

Organizata sugjeron që 180 GW panele diellore të instalohen në të mbjellat e vendeve të Evropës Qendrore, që do të jetë trefishi i kapacitetit të synuar deri në vitin 2030 në projekt-planet kombëtare të energjisë, dhe shtatë herë më shumë se kapaciteti total i instaluar në të gjitha vendet aktualisht.

Duke pasur 19% të tokës së punueshme të BE-së, të ashtuquajturat vendet e Grupit të Vishegradit prodhojnë një sasi të madhe të kulturave kryesore si gruri, tërshëra dhe thekra, prodhim që mund të rrezikohet nga çmimet e paqëndrueshme të plehut, thatësirat e përsëritura dhe moti ekstrem.

Analiza sugjeron që, përveç të ardhurave shtesë për fermerët, instalimi i paneleve diellore mund të përmirësojë mbajtjen e ujit në periudhat e thatësirës dhe të mbrojë të korrat nga moti ekstrem, në disa raste madje duke rritur rendimentin.

Për frutat që duan hije, agrovoltaika mund të çojë në rritje të të korrave deri në 16%, ndërsa prodhon 63% të energjisë elektrike të një rrjeti diellor tradicional, përfundon raporti. “Me Evropën gjithnjë e më nën kërcënim në kohë të paqëndrueshme, siguria ushqimore dhe energjia janë absolutisht jetike,” thonë autorët e analizës.

Në Francë, Gjermani, Itali dhe Holandë, rregulloret lejojnë përdorimin e përbashkët të tokës për bujqësi dhe prodhimin e energjisë elektrike pa humbje të subvencioneve bujqësore, një fakt që ka mundësuar tashmë mbi 200 projekte agrovoltaike në të gjithë Evropën.

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.