BE, makinat elektrike do të përbëjnë 24% të tregut në 2025 – Pritet rritje e shitjeve falë modeleve të reja me çmime më të ulëta

Kristi Ceta/SCAN

 

Makinat me bateri elektrike të shitura në Bashkimin Evropian do të përbëjnë midis 20% dhe 24% të tregut total deri në vitin 2025, kryesisht për shkak të çmimeve më të lira të shitjes, sipas grupit të fushatës Transport & Environment (T&E).

Shitjet e automjeteve elektrike në BE janë ngadalësuar muajt e fundit, duke arritur në 14% në gjysmën e parë të vitit, pjesërisht për shkak të politikave të ndryshme për stimujt e gjelbër në të gjithë bllokun, ndërsa rregullatorët, që kërkojnë të mbrojnë industrinë e BE-së, kanë imponuar tarifat për makinat kineze.

Gjermania, tregu më i madh i BE-së për makinat elektrike, në shtator prezantoi direktivat për të përshpejtuar tranzicionin e gjelbër.

T&E, e cila në qershor kishte parashikuar një përqindje prej 21% për vitin e ardhshëm, parashikon që shitjet të rriten. Kompania tha se parashikimet e reja marrin parasysh mbërritjen e pritshme në 2024 dhe 2025 të shtatë modeleve të reja plotësisht elektrike me çmim nën 25,000 euro, që do të përbëjnë 10%-15% të tregut “elektrik” vitin e ardhshëm.

Makinat elektrike duhet të kontribuojnë me rreth 60% të reduktimit të dioksidit të karbonit (CO2) që kërkojnë prodhuesit e makinave për të arritur objektivat e emetimeve të BE-së vitin e ardhshëm, ndërsa opsionet hibride mund të kontribuojnë me 20% të reduktimit të emetimeve.

Duke u përballur me një rënie të kërkesës dhe rritjen e konkurrencës nga rivalët më të lirë kinezë, prodhuesit evropianë u kanë kërkuar ligjvënësve të BE-së të aktivizojnë një klauzolë krize që do të shtynte objektivat e tyre për CO2 me dy vjet.

T&E tha se ligjvënësit duhet t’i rezistojnë çdo lëvizjeje për të dobësuar ose vonuar objektivat 2025-2030 dhe elektrifikimi duhet të mbështetet nga politika të fuqishme kombëtare.

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.