Efekti i fondeve, 25 mijë fermerë futen në skemën e sigurimeve – 6 mujori/ Rritje me 15.2 për qind krahasuar me 2023-shin, kryeson Fieri

Elisabeta Dosku/ SCAN

 

Skemat e subvencioneve në bujqësi dhe më së shumti pagesat që jepen për naftën për kryerjen e punimeve të mekanizuara në bujqësi, po vijojnë të nxisin fermerët që të formalizohen, duke qenë se është kushti kryesor për përfitim. Po ashtu rritja e ndërgjegjësimit për nevojën e pagesës së kontributeve ka sjellë një shtim të numrit të të siguruarve që punojnë si të vetëpunësuar në bujqësi.

Referiuar të dhënave zyrtare nga Insitituti i Sigurimeve Shoqërore, për periudhën janar – qershor 2024 numri i të siguruarve si të vetëpunësuar në bujqësi arriti në 24,930, duke u rritur me 15.2% më shumë se njëjta periudhë një vit më parë.

Ndërsa viti 2023 u mbyll me një shifër prej 75.451 fermerësh kontribues në skemën e sigurimeve shoqërore.

Nëse do të analizonim të dhënat në bazë qarqesh, Fieri zë vendin e parë për nga numri i kontribuuesve, ndjekur nga Elbasani, Vlora, Korça dhe Tirana. Ndërsa numri më i ulët regjistrohet në Kukës. Por sa është masa e kontributit që dredhin të vetëpunësuarit në bujqësi? Referuar legjislacionit në fuqi,  i vetëpunësuari në bujqësi, që banon në zonat fushore, duhet të derdhë kontributet për sigurimet shoqërore, kundrejt detyrimit tremujor, të llogaritur mbi bazën e masës vjetore prej 38, 400 lekësh.

Ndërsa ata që banojnë në zonat malore, paguajnë  29. 400 lekë në vit.

Instituti i Sigurimeve Shoqërore dhe Drejtoritë Rajonale po ndërmarrin fushata të vazhdueshme të ndërgjegjësimit në terren, me qëllim që të vetëpunësuarit në bujqësi të përfitojnë nga avantazhet që ofrojnë skemat e dedikuara për këtë kategori.

Derdhja e kontributeve u jep të vetëpunësuarve në bujqësi të drejtën e përfitimit të pensionit. Pensioni i pleqërisë për këto kategori është mesatarisht 9,656 lekë në muaj, i invaliditetit 8,195 lekë dhe familjar 2,516 lekë në muaj, ndërsa në zonat urbane është dyfish më shumë.

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.