BE ul tarifat për automjetet Tesla të prodhuara në Kinë: Çfarë ndikimi do ketë tek çmimet?

Edel Strazimiri / SCAN

 

BE-ja ka ulur një tarifë shtesë për automjetet elektrike Tesla (EV) të prodhuara në Kinë në 9%, nga 20.8% e planifikuar më parë. Kjo normë e re është dukshëm më e ulët se diapazoni prej 17% deri në 36.3% i vendosur ndaj prodhuesve të tjerë kinezë të EV, gjë që mund të rrisë potencialisht shitjet e Tesla-s në rajon.

Megjithatë, plani i nënshtrohet miratimit nga shumica e 27 vendeve anëtare të BE-së përpara 31 tetorit. Nëse miratohen, tarifat e reja do të mbeten në fuqi për pesë vitet e ardhshme. Vendimi pasoi kërkesën e Tesla-s për një vlerësim individual në lidhje me tarifat e Komisionit Europian për automjetet elektrike të prodhuara në Kinë, të cilat u përshkruan në korrik.

BE beson se subvencionet e Pekinit për industrinë janë “të padrejta” dhe do të shkaktonin “dëmtime materiale” për prodhuesit e makinave të BE-së. Pasi kreu hetimin e tij, Komisioni arriti në përfundimin se Tesla mori më pak subvencione nga qeveria kineze. Prodhuesi i makinave me bazë në SHBA ka përfituar kryesisht nga furnizimet me bateri nën vlerën e tregut, si dhe nga përdorimi i favorshëm i tokës dhe reduktimet e taksave mbi të ardhurat për eksportuesit në Kinë.

Tarifa shtesë e vendosur është si shtesë e taksës ekzistuese prej 10% të aplikuar për importet e EV të Kinës. BE ka rishikuar gjithashtu tarifat për prodhuesit e tjerë kinezë të makinave, duke i vendosur ato në 36.3% për SAIC Motor, 19.3% për Geely dhe 17% për BYD – të gjitha këto janë pak më të ulëta se propozimet e mëparshme. Prodhuesit kinezë të automjeteve elektrike, të cilët bashkëpunuan me hetimin e BE-së, u janë caktuar tarifa më të ulëta në propozim, me 21.3% për Dongfeng Motor Group dhe Nio. Ata që nuk bashkëpunuan mund të përballen me një tarifë prej 36.3%.

Ministria kineze e Tregtisë u përgjigj duke deklaruar se vendimi i BE-së bazohej në “fakte të përcaktuara në mënyrë të njëanshme nga pala e BE-së, jo në fakte të dakorduara reciprokisht”. Kina e kundërshton me vendosmëri vendimin dhe shpreh shqetësim të madh, duke argumentuar se nuk ka prova të mjaftueshme që importet kineze të automjeteve elektrike kanë shkaktuar “dëmtim të konsiderueshëm material” te prodhuesit e makinave të BE-së.

Çfarë nënkuptojnë tarifat për çmimet e makinave në Europë?

Siç theksohet nga ING, tarifat do të rrisin çmimet e EV – dhe do të ngadalësojnë shtytjen për zero neto. “Qëllimi i BE-së për të hequr gradualisht automjetet ICE deri në vitin 2035 po përballej tashmë me sfida. Pjesa e tregut të automjeteve elektrike me bateri ra nga 14.5% në 2023 në 12% në katër muajt e parë të 2024. Taksat shtesë për EV-të kineze mund të vonojnë disponueshmërinë e një gamë më e madhe e EV-ve më të përballueshme në Europë.”

ING gjithashtu vuri në dukje se EV në Europë mbeten shumë të shtrenjta për konsumatorët mesatarë. “Çmimet mesatare të shitjes me pakicë të EV në Kinë janë dukshëm më të ulëta se në Europë. Për shembull, në Gjermani, MG4 e SAIC kushton 34,900 €, ndërsa në Kinë është 109,800 juanë (13,917 €). Megjithatë, ky është nën çmimin mesatar të blerjes së një EV në Evropë, pasi shumica e makinave të shitura në Europë janë ende modele premium. “Masat e propozuara të BE-së do t’i bëjnë EV-të edhe më të shtrenjta dhe më pak të aksesueshme për konsumatorët evropianë,” tha ING në një raport.

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.