Inflacioni i Eurozonës rritet në korrik – Euro fiton terren ndaj dollarit amerikan

Kristi Ceta/SCAN

 

Inflacioni i Eurozonës u konfirmua 2.6% në korrik, nga 2.5% që ishte në qershor. Rritja e inflacionit, së bashku me pritjet për ulje të normës së Rezervës Federale, e kanë shtyrë euron në nivelin më të lartë të 9-mujorit kundrejt dollarit amerikan.

Inflacioni bazë, i cili heq çmimet e paqëndrueshme të energjisë dhe ushqimeve, mbeti i qëndrueshëm në 2.9%, duke nënvizuar presionet themelore të çmimeve që mbeten mbi objektivin prej 2% të bankës qendrore.

Në korrik 2024, kontribuesit kryesorë në normën vjetore të inflacionit të eurozonës ishin shërbimet (1,82 pikë përqindje), të ndjekur nga ushqimi, alkooli dhe duhani (0,45 pikë përqindje), mallrat industriale joenergjetike (0,19 pikë përqindje) dhe energjia (0,12) pikë përqindjeje).

Ndër vendet anëtare të eurozonës, Finlanda (0.5%), Letonia (0.8%) dhe Danimarka (1.0%) regjistruan normat vjetore më të ulëta të inflacionit. Nga ana tjetër, Rumania (5.8%), Belgjika (5.4%) dhe Hungaria (4.1%) panë normat më të larta.

Banka Qendrore Evropiane raportoi se llogaria rrjedhëse e eurozonës regjistroi një suficit prej 51 miliardë euro në qershor 2024, më i larti i regjistruar ndonjëherë, nga 38 miliardë euro në muajin e kaluar.

Gjatë 12 muajve deri në qershor 2024, suficiti arriti në 370 miliardë euro (2.5% e PBB-së së zonës së euros), një rritje e konsiderueshme nga 30 miliardë euro (0.2%) një vit më parë.

Euro ruajti fuqinë e saj në 1,1080 kundrejt dollarit amerikan, në nivelin më të lartë që nga fundi i dhjetorit. Monedha ka shënuar rritje në pesë nga gjashtë seancat e fundit, të nxitura edhe nga pritshmëritë se Rezerva Federale së shpejti mund të fillojë uljen e normave të interesit.

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.