Biznese online me mallra kontrabandë – Policia, kontrolle në Tiranë, Krujë dhe Durrës. Arrestohen 4 persona

Ernilda Luzi/ Scan

 

Drejtoria Vendore e Policisë Tiranë bën me dije, se katër persona janë arrestuar pasi akuzohet se shisnin mallra kontrabandë online. Policia ka ushtruar kontrolle në Tiranë, Krujë dhe Durrës.

Specialistët e Sektorit për Hetimin e Krimit Ekonomike dhe Financiare të DVP Tiranë kanë finalizuar operacionin policor të koduar “Hidden money”. Gjatë operacionit janë ndaluar 4 shtetas, janë proceduar në gjendje të lirë 2 shtetas, si dhe po punohet për kapjen e 3 të tjerëve.

Drejtoria Vendore e Policisë Tiranë njofton se po vazhdojnë të zhvillohen kontrolle në 13 subjekte të ndryshme në Tiranë, Krujë dhe Durrës. Subjektet e lartpërmendura tregtonin mallra të ndryshme dhe kryenin aktivitetin e tyre kryesisht online, nëpërmjet rrjeteve sociale “Facebook”, “Instagram” dhe “Tik-Tok”, duke mos deklaruar shitjet në organet tatimore, si dhe duke futur produkte kontrabandë, në Republikën e Shqipërisë.

Nga përllogaritjet e strukturave të Hetimit Tatimor janë analizuar dërgesat e postës për secilin subjekt, duke i ndarë në vite dhe më pas janë krahasuar me deklarimet e kryera nga çdo subjekt, dhe janë krahasuar deklarimet në tatime me deklarimet në postë, ku rezulton një diferencë totale prej 1 500 000 euro.

Në cilësinë e provës materiale janë sekuestruar mallra të ndryshme, të dyshuara të kontrabanduara, si dhe celularët e shtetasve të proceduar, ndërsa materialet i kaluan Prokurorisë.

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.