Turizmi kulturor, 394 mln leke të ardhura – Ministri Gonxhja: 1.1 mln vizitorë në sitet arkeologjike e kulturore
Ernilda Luzi/ Scan
Nga kalatë madhështore, muzetë plot histori, e deri tek parqet arkeologjike që magjepsin çdo vizitor, viti 2024 ka shënuar rekorde historike për turizmin kulturor në Shqipëri. Ministri i Ekonomisë, Kulturës dhe Inovacionit Blendi Gonxhja nëpërmjet një postimi bën të ditur shifrat, ku gjatë periudhës janar-shtator vendi ka pritur rreth 1.1 mln vizitorë në sitet arkeologjike e kulturore, duke shënuar një rritje prej 35% krahasuar me vitin 2023.
Sipas shifrave, përgjatë periudhës janar-shtator 2024 patën 40% më shumë turistë të huaj dhe 31% më shumë vizitorë vendas.
Por, cilat janë destinacionet e trashëgimisë kulturore më të preferuara?
Tre destinacionet më të preferuara janë: Kalaja e Gjirokastrës që kryeson listën me 196,515 vizitorë; Parku Kombëtar Butrint me 127,753 vizitorë dhe Muzeu “Gjergj Kastrioti”, Krujë me 100,874 vizitorë.
Rritja e vizitorëve në sitet arkeologjike e kulturore përkthehet dhe në të ardhura, ku shifra shkon në 394 mln lekë, pra rreth 41% më shumë se një vit më parë, thekson ministri Gonxhja.
Tashëgimia historike e kulturore e vendit ofron potencial të konsiderueshëm dhe mbetet një atraksion i preferuar turistik. Vendndodhja gjeografike e Shqipërisë favorizon zhvillimin e një industrie turistike gjatë gjithë vitit.
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.