Resortet turistike, prioritet hotelet e markës – Miliona euro investime, rregullore për parandalimin e ndërtimeve të tepërta

Ola Mitre / SCAN

 

Strategjia e investimeve në resorte duhet të orientohet drejt rritjes së rëndësisë së hoteleve dhe komponentëve të rezidencave të markës, në vend të rezidencave jo të markës”. Gjithçka përcaktohet në draft strategjinë Kombëtare të Turizmit 2024 -2030, që ndër të tjera kërkon hartimin e një rregulloreje që do të përcaktojë një kuadër të qartë për zhvillimin e projekteve turistike me shumë komponentë, ku përfshihen hotelet dhe rezidencat e markës dhe jo të markës.

Sipas dokumentit, arritja e një strukture të mirëbalancuar të tipologjive të ndryshme të akomodimit brenda resorteve të ardhshme turistike, është thelbësore për të siguruar qëndrueshmëri afatgjatë dhe për të parandaluar ndërtimet e tepërta me të cilat po përballet Shqipëria.

Sa i takon hoteleve të markës, sipas dokumentit kjo mund të bëhet duke përcaktuar kapacitetin total të zonës turistike dhe duke respektuar raportin e detyrueshëm midis kapaciteteve hoteliere dhe kapaciteteve rezidenciale.

Në dokument sillet në vëmendje se, në tregun e investimeve në turizëm në Shqipëri ka spikatur hyrja e markave ndërkombëtare të hoteleve. Investimet kryesohen nga hotelet e markës Melia, me 669 dhoma të projektuara, ndërsa vendin e dytë e mbajnë hotelet e markës Accor, me 616 dhoma të planifikuara, pasuar nga Hyatt me 447 dhoma.

Për sa u përket investimeve totale për dhomë, kryesojnë investimet në hotelet e markës Marriott, me një investim mesatar prej 322 581 euro për dhomë, pasuar nga hotelet Hilton, me 201 149 euro për dhomë, dhe Melia me 122 571 euro investim për dhomë.

Në lidhje me shifrat totale të investimeve, kryeson Accor me një vlerë totale investimi prej 122 milionë euro, pasuar nga Marriott me 100 milionë euro dhe Melia me 82 milionë euro. Nga një vlerë totale investimesh prej 792 milionë euro, 65% janë projekte të kategorisë me 5 yje, me një investim total prej 615 milionë euro, ndërsa projektet me 4 yje përfaqësojnë 35% të totalit, me 177 milionë euro investime.

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.