Britani, të pasurit kërkojnë ndryshim taksash – Investitorët me banim jashtë vendit synojnë të parandalojnë eksodin e pasurisë

Kristi Ceta/SCAN

Individët e pasur që janë rezidentë në Britani, por kanë vendbanimin jashtë shtetit, po i kërkojnë qeverisë të prezantojë një regjim të taksës së sheshtë të stilit italian për të parandaluar një eksod të pasurisë, pasi statusi i tyre preferencial kërcënohet në buxhetin e ardhshëm.

Investitorët e huaj për Britaninë, një grup lobimi i përbërë nga persona që nuk banojnë në vend dhe këshilltarët e tyre, së bashku me grupin e ekspertëve Oxford Economics kanë propozuar një regjim tatimor të shkallëzuar. Ky regjim do t’u ngarkonte të huajve të pasur një tarifë të vetme vjetore në këmbim të përjashtimit nga tatimi mbi trashëgiminë e aseteve jashtë Mbretërisë së Bashkuar dhe tatimin brenda vendit mbi të ardhurat deri në 15 vjet.

Tarifa të tilla do të vendosen sipas pasurisë neto të një individi, me shifra vjetore të propozuara që variojnë nga 200,000 paund për ata me vlerë deri në 100 milionë dhe një tarifë vjetore prej 2 milionë për ata që vlerësohen mbi 500 milionë paund. Ky sistem ndryshon nga regjimi i Italisë, i cili ngarkon një normë të dyfishuar së fundmi prej 200,000 euro në vit, pavarësisht nga grupimi i pasurisë. Investitorët e huaj për Britaninë do të takohen me zyrtarë qeveritarë për të diskutuar propozimet.

Statusi “jodomicil” i Mbretërisë së Bashkuar është një rregull tatimor i epokës koloniale, i cili u lejon njerëzve që jetojnë në vend, por që kanë vendbanimin diku tjetër, të shmangin pagimin e tatimit mbi të ardhurat dhe fitimet kapitale nga jashtë për deri në 15 vjet. Në vitin 2023, rreth 74,000 njerëz e gëzonin këtë status, nga 68,900 një vit më parë.

Ndërsa regjimi ka qenë prej kohësh politikisht i diskutueshëm, ai ishte nën presion gjatë muajve të fundit, pasi Partia Laburiste në gusht njoftoi planet për të përshpejtuar heqjen e planifikuar të statusit. Ministrja e Financave Rachel Reeves pritet të njoftojë rritje të parakohshme të taksave në buxhetin e 30 tetorit, për të mbyllur një boshllëk financiar prej 40 miliardë paundësh në financat publike. Reeves kishte thënë më parë se heqja e programit mund të gjeneronte 2.6 miliardë paund për Thesarin gjatë qeverisjes së ardhshme.

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.