Energjia globale e erës, drejt një rekordi të ri – Prodhimi mund të arrijë 10% të totalit botëror në dy muajt e fundit të vitit

Kristi Ceta/SCAN

Prodhimi global i energjisë elektrike nga era mund të vendosë një rekord të ri në vitin 2024, pasi dimri fillon në të gjithë hemisferën veriore dhe shpejtësia e erës rritet në pjesën më të madhe të fermave në botë.

Prodhimi global i energjisë elektrike nga era në nëntë muajt e parë të vitit 2024 është rritur vetëm rreth 7% kundrejt të njëjtës periudhë të vitit 2023, sipas grupit të ekspertëve për energjinë Ember. Por tendencat historike sugjerojnë se kjo shifër mund të rritet në muajt e fundit të vitit, duke e shtyrë gjenerimin vjetor drejt një rekordi të ri.

Kulmi vjetor i gjenerimit të energjisë së erës zakonisht ndodh gjatë dimrit të hemisferës veriore, pasi mbi 90% e fermave me erë që funksionojnë, ndodhen në Azi, Evropë dhe Amerikën e Veriut. Nëse prodhimi i erës rritet në përputhje me këto pritshmëri, ka të ngjarë të përbëjë më shumë se 10% të totalit mujor global të energjisë elektrike në nëntor dhe dhjetor. Kjo do të ishte hera e parë që do të arrinte në këtë nivel.

Potenciali i gjenerimit të kësaj energjie në muajt e fundit të 2024 do të varet kryesisht nga shpejtësia e erës në Kinë, Shtetet e Bashkuara dhe Gjermani, të cilat së bashku janë shtëpia e 64% të kapacitetit aktual të gjenerimit global, sipas Global Energy Monitor (GEM).

Vetëm Kina përbën 43% të kapacitetit global, rreth 400,000 megavat (MW), duke e bërë atë deri tani tregun më të rëndësishëm të erës. Sipas Ember, gjatë nëntë muajve të parë të vitit 2024, prodhimi i energjisë elektrike nga era në Kinë ishte 712 teravat orë (TWh). Ky total ishte 11% më i lartë se e njëjta periudhë në 2023, që do të thotë se prodhimi i Kinës gjatë gjithë vitit është në rrugën e duhur për t’u rritur me mbi 10% sapo të përfundojë gjenerimi gjatë muajve të fundit të vitit.

Shtetet e Bashkuara janë tregu i dytë më i madh i erës, me rreth 145,000 MW kapacitet. Nga janari deri në shtator, prodhimi i kësaj energjie ishte 333 TWh, 6.2% më shumë nga të njëjtët muaj të vitit të kaluar.

Gjermania, prodhuesi më i madh në Evropë, ka rreth 47,000 MW kapacitet aktual të erës, i cili ka gjeneruar rreth 94 TWh energji elektrike deri më tani në 2024. Kjo është një rritje prej 7% krahasuar me nëntë muajt e parë të vitit të kaluar.

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.