Europa e uritur për energji po i ‘zhyt’ vendet në zhvillim në krizë më të thellë energjetike!

Bangladeshi pësoi ndërprerjen e energjisë elektrike më të keqe që nga viti 2014 të martën (4 tetor), një simptomë e furnizimeve të ndërprera të karburantit dhe një pamje paraprake e asaj se me çfarë mund të përballen vendet e tjera në muajt e ardhshëm.

Rreth 80% e vendit u përball me ndërprerje të energjisë elektrike duke filluar nga ora 14:00 me orën lokale, tha për Reuters zyrtari i Bordit të Zhvillimit të Energjisë në Bangladesh, Shameem Hasan. Trafiku u ndal, tregtarët u përpoqën të punonin me elektrik dore dhe njerëzit u dyndën në pikat e karburantit për të marrë naftë për të ndezur gjeneratorët.

U deshën shtatë orë që energjia elektrike të rivendosej plotësisht. Por edhe kur energjia u kthye, problemet e energjisë nuk ishin zhdukur plotësisht dhe kjo nuk ishte një ngjarje anormale.

Gjatë dy muajve të fundit, Bangladeshi i është drejtuar ndërprerjeve të shpeshta të energjisë elektrike për furnizimet me racione, mes çmimeve të larta globale të karburantit. Masat ekstreme kanë përfshirë mbylljen e shkollave një ditë shtesë çdo javë dhe detyrimin e zyrave qeveritare dhe bankave për të shkurtuar ditët e tyre të punës.

Edhe para shpërthimit të luftës, furnizimet me gaz që shkonin në Azi po devijoheshin drejt Europës. Tashmë me luftën Rusi-Ukrainë që shtrydh furnizimin, vendet më të pasura europiane po marrin pakësim për çdo gjë që është në dispozicion. Me afrimin e dimrit dhe kufirin në importet e karburanteve ruse, blerësit europianë do të kërkojnë të rezervojnë edhe më shumë LNG.

Kjo po vjen me kosto jo vetëm të Bangladeshit, por edhe të disa vendeve në zhvillim. India po përballet me krizën e saj më të keqe të energjisë në 6 vitet e fundit, ndërkohë që po lufton për të gjetur furnizues në tregjet ndërkombëtare. Sri Lanka dhe Bangladeshi po ashtu e kanë të vështirë të furnizojnë gazin për shkak të mungesës në BE duke rritur çmimet.

Mbi një dekadë më parë, Pakistani kishte lidhur kontrata afatgjata me furnizues të huaj të gazit natyror të lëngshëm (LNG) në Itali dhe Katar, posaçërisht për t’u izoluar nga çmimet e paqëndrueshme. Por tani, këto firma vazhdojnë t’u shërbejnë tregjeve fitimprurëse europiane, ndërkohë që dështojnë ndaj Pakistanit. Qeveria madje çoi në gjykatë firmën italiane të energjisë Eni dhe tregtarin zviceran të mallrave Gunvor duke kërkuar 40 miliardë dollarë dëmshpërblim. Megjithatë, vendi po dështon të tërheqë ofertat për LNG, sepse prodhuesit janë tepër të përkushtuar ndaj vendeve europiane, si dhe Kinës dhe Japonisë vende më të pasura që janë në gjendje të paguajnë çmime më të larta. E gjithë kjo ndërkohë që miliona qytetarë vazhdojnë të jetojnë pa energji elektrike për më shumë se 12 orë në ditë.

Edhe pas gërvishtjes së fundit të fuçisë së furnizuesve të gazit, vendet europiane mund të shikojnë mungesa këtë dimër. Disa qeveri kanë paralajmëruar tashmë se njerëzit mund të duhet të përballen me ndërprerje energjie, të bëjnë dush më të shkurtra dhe të përdorin më pak ngrohje.

Për vendet në zhvillim që kanë luftuar gjithmonë për të marrë dhe shpërndarë energjinë, kjo praktikë tingëllon tepër e njohur. Për të ruajtur dhe racionuar burimet duke mbrojtur rrjetet e energjisë elektrike, autoritetet shpesh ndërpresin energjinë për disa njerëz për ca kohë me njoftim paraprak.

Edel Strazimiri / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.