Europa, nuk “harron” hidrocentralet – Prodhimi i energjisë së pastër kalon në nivel tjetër

Prodhimi i energjisë elektrike nga hidrocentralet në të gjithë Europën ishte 388 teravat orë (TWh), nga janari deri në maj të vitit 2024, sipas grupit të ekspertëve për energjinë “Ember”.

Ky total krahasohet me 330 TWh gjatë të njëjtëve muaj të vitit të kaluar dhe është më i larti për atë periudhë pesëmujore në të paktën nëntë vjet pas reshjeve mbi mesataren në pjesën më të madhe të Europës kontinentale deri më tani në 2024-ën.

Së bashku me prodhimin rekord nga fermat e erës dhe diellore, totali i gjenerimit të hidrocentraleve ndihmoi në rritjen e prodhimit të energjisë elektrike të pastër në Europë në një rekord prej 1.260 TWh në janar deri në maj të këtij viti, që shënon një përparim prej 9.4% nga të njëjtët muaj në 2023-shin.

Prodhimi më i lartë i energjisë së pastër i ka lejuar prodhuesit europianë të reduktojnë prodhimin e energjisë elektrike të prodhuar nga karburantet fosile me më shumë se 9% për pesë muajt e parë të vitit.

Përdorimi më i ulët i karburanteve fosile ka ulur emetimet e sektorit të energjisë në Europë me rreth 9% në nivelin më të ulët në mbi 9 vjet, tregojnë të dhënat e Ember.

Rimëkëmbja në prodhimin e energjisë hidrike është parë në të gjithë Europën kontinentale. Nga 1 janari deri më 23 qershor, prodhimi hidro në Francë – prodhuesi më i madh i hidrocentraleve në Europën kontinentale – ishte 3.7 milionë gigavat orë – GWh, sipas të dhënave të përpiluara nga LSEG.

Ky total shënon një rritje më shumë se 50% nga 2.4 milionë GWh të gjeneruara gjatë së njëjtës periudhë në 2023 dhe është 12% më shumë se mesatarja afatgjatë gjatë asaj periudhe. Emetimet nga sektori i naftës dhe gazit sollën 120 milionë tonë metrikë metan në atmosferë vitin e kaluar, sipas një raporti të fundit të IEA.

Në Itali, prodhimi hidrocentral është rritur me 49% për të njëjtën periudhë të vitit 2023 dhe 23.4% mbi mesataren afatgjatë, ndërsa prodhimi hidro i Gjermanisë deri më tani këtë vit është 44% mbi mesataren afatgjatë, tregojnë të dhënat e LSEG.

Prodhimi i hidrocentraleve në zonën ujëmbledhëse të Alpeve, që është një grumbullim i prodhimit në të gjithë Austrinë, Francën, Italinë dhe Zvicrën u rrit 40% nga e njëjta periudhë e vitit të kaluar dhe është 14.4% mbi normalen.

Dorina Kurtaj /SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.