“Eurozonës i duhen rregulla të reja” / Ish-presidenti i BQE, Draghi: Sovraniteti duhet ndarë më mirë!

Në Eurozonë nevojiten “rregulla të reja dhe më shumë sovranitet i përbashkët”: Mario Draghi e pohoi këtë në një artikull në ‘Economist online’. Sipas tij, strategjitë që siguruan prosperitetin dhe sigurinë e Europës në të kaluarën, duke u mbështetur tek Amerika për sigurinë, Kina për eksportet dhe Rusia për energjinë, janë bërë të pamjaftueshme, të pasigurta apo të papranueshme. Ish-presidenti i Bankës Qendrore Europiane theksoi se për sa i përket politikat buxhetore ‘kthimi pasiv i rregullave të vjetra të pezulluara gjatë pandemisë do të ishte rezultati më i keq i mundshëm’.

Sipas Draghit, Europa tani duhet të përballet me një sërë sfidash mbikombëtare që do të kërkojnë investime të mëdha në afat të shkurtër, duke përfshirë mbrojtjen, tranzicionin e gjelbër dhe dixhitalizimin, duke shpjeguar se aktualisht Europa nuk ka një strategji për t’i financuar ato. Por as politikat kombëtare nuk mund të marrin rolin, pasi rregullat europiane për buxhetet dhe ndihmën shtetërore kufizojnë aftësinë e vendeve për të vepruar në mënyrë të pavarur.

Pra, sipas tij ekziston rreziku serioz që Europa të mos arrijë objektivat e saj klimatike, të mos garantojë sigurinë e kërkuar nga qytetarët e saj dhe të humbasë bazën e saj industriale në avantazh të rajoneve që vendosin më pak kufizime ndaj tyre. Për këtë arsye, thekson Draghi, kthimi pasiv te rregullat e vjetra fiskale, të pezulluara gjatë pandemisë, do të ishte rezultati më i keq i mundshëm.

Në veçanti, receta për ish-presidentin e BQE-së është kapërcimi i atyre rregullave buxhetore dhe të ndihmës shtetërore që kufizojnë aftësinë e vendeve individuale për të vepruar në mënyrë të pavarur. Ky nuk është rasti i asaj që po ndodh në SHBA, kujton Draghi, ku administrata e Biden po përafron shpenzimet federale dhe stimujt tatimorë me ndjekjen e qëllimeve kombëtare. Por thjesht zbutja e rregullave fiskale dhe të ndihmës shtetërore, duke lejuar shtetet anëtare të mbajnë mbi supe pjesën më të madhe të investimeve të nevojshme, do të ishte qasja e gabuar për Draghin.

Rruga kryesore – shkruan ish-kryeministri – është përkundrazi ripërcaktimi i kuadrit të politikave buxhetore të BE-së dhe proceseve vendimmarrëse. Prandaj rregulla të reja që janë strikte, për të garantuar financa të besueshme shtetërore në periudhë afatmesme, por edhe mjaft fleksibël, për të lejuar qeveritë të reagojnë ndaj goditjeve të papritura dhe më pas duhet transferuar më shumë fuqi shpenzuese në qendër. Në funksion të zgjerimeve të mëtejshme të BE-së në Ballkan dhe Ukrainë, Draghi bën apel që të shmanget përsëritja e gabimeve të së kaluarës, zgjerimi i periferisë pa forcuar qendrën.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.