France, punimet ne minierën e litiumit nisin në 2028 – Qeveria e shpall projektin të interesit kombëtar

Një projekt për të hapur një minierë litiumi në Echassier është pjesë e strategjisë së Francës për t’u çliruar nga varësia nga importi i lëndëve të para të rralla, veçanërisht nga Kina, raporton Le Monde.

Një nga projektet më të mëdha europiane të minierave të litiumit, i realizuar nga grupi Imeris në Alije, i është bashkuar listës së “projekteve me interes të madh kombëtar”, që është sinonim i procedurave të përshpejtuara, sipas dekretit të publikuar në Fletoren Zyrtare. Prodhimi i baterive të litiumit për automjetet elektrike është një element kyç i tranzicionit të energjisë.

Sipas Imeris, projekti, i quajtur Emili, synon të prodhojë litiumin e nevojshëm për prodhimin e baterive për më shumë se 700.000 automjete gjatë 25 viteve nga viti 2028.

Imeris vlerëson se projekti i saj, i përshkruar si “projekti më i madh i minierave në Francë për më shumë se gjysmë shekulli”, do të krijonte 500 vende pune direkte dhe 1000 vende pune indirekte.

Statusi i “projekteve me interes të madh kombëtar”, i prezantuar nga Akti i Industrisë së Gjelbër të tetorit 2023, lejon që projektet industriale me rëndësi për tranzicionin ekologjik ose sovranitetin kombëtar të përfitojnë nga masat për përshpejtimin e pengesave administrative.

Në mbarë botën, deri në vitin 2022, minierat e litiumit ishin 47% nga Australia, 30% nga Kili dhe 15% nga Kina. Në Europë, vetëm Portugalia prodhon pak litium, me 0.5% të prodhimit global të minierave në vitin 2022, sipas të dhënave të USGS.

Në maj, Agjencia Ndërkombëtare e Energjisë inkurajoi rritjen e investimeve në miniera për të kufizuar ngrohjen globale në 1.5 gradë Celsius deri në fund të shekullit.

Dorina Kurtaj /SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.