Gati për mbërritjen e emigrantëve nga Italia – Qytetarët shprehin mikpritjen, ndërsa grupi i parë akomodohet në Shëngjin

Kristi Ceta/SCAN

 

Banorët vendas në qytetin shqiptar të Shëngjinit thanë të martën për agjencinë e lajmeve Reuters se ishin gati për ardhjen e grupit të parë të emigrantëve të dërguar nga Italia.

“Janë më se të mirëpritur sepse edhe ne i kemi fëmijët atje, në Itali”, tha banorja e Shëngjinit Flora Gjeci.

Italia po transporton grupin e parë të emigrantëve në Shqipëri me një anije të marinës, duke aktivizuar një plan të diskutueshëm për të dërguar mijëra azilkërkues jashtë vendit.

Anija Libra është nisur nga afër ishullit Lampedusa me 16 emigrantë meshkuj që u shpëtuan në det të dielën. Dhjetë janë nga Bangladeshi dhe gjashtë nga Egjipti, që të dy konsiderohen vende të sigurta nga Italia.

Qeveria e Giorgia Melonit ka ndërtuar dy qendra pritjeje në Shqipëri, marrëveshja e parë e tillë që përfshin një vend të Bashkimit Evropian që i drejton emigrantët në një vend jashtë BE-së në një përpjekje për të penguar ardhjet e parregullta.

Marrëveshja e vitit 2023 me Shqipërinë parashikon që emigrantët e parregullt që mbërrijnë në Itali do të dërgohen me anije në qytetin port të Shëngjinit, ku do të identifikohen dhe do të shqyrtohen kërkesat e tyre për azil. Më pas ata do të udhëtojnë deri në qytetin e vogël të Gjadrit, ku do të akomodohen.

Aktualisht janë 21 kombe që klasifikohen si të sigurta në listën italiane. Vitin e kaluar, 56,588 emigrantë mbërritën në Itali nga vetëm katër prej tyre, Bangladeshi, Egjipti, Bregu i Fildishtë dhe Tunizia.

Sipas kushteve të marrëveshjes me Shqipërinë, deri në 36,000 emigrantë mund të dërgohen në vendin ballkanik çdo vit.

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.