Gjermania me plan multi miliarda për industrinë – Subvencione për të lehtësuar kompanitë me intensitet energjie
Përballë rrezikut për t’u braktisur nga industritë e tij që nxitojnë të përfitojnë nga programi i subvencioneve prej 369 miliardë dollarësh të SHBA – ve, Berlini po përgatitet të tregojë mbështetje të madhe ndaj bizneseve, për t’i mbajtur ato në Gjermani. Pa specifikuar shumën e saktë, ministria gjermane e financave bëri të ditur se do të vërë në dispozicion një shifër dyshifrore prej miliarda euro për të mbështetur industritë dhe për të lehtësuar kalimin e tyre në ekonominë e gjelbër.
Për këtë qëllim, ajo po krijon një mekanizëm të quajtur “Kontratat e karbonit për diferencën”, i cili do të inkurajojë kalimin e industrive intensive të punës nga lëndët djegëse fosile në burimet e rinovueshme dhe hidrogjen. Ky mekanizëm u mundëson industrive që reduktojnë emetimet të përfitojnë nga subvencionet e shtetit gjerman. Ministria gjermane theksoi se nga subvencionet do të përfitojnë industritë me energji intensive të të gjitha përmasave.
Planet e Berlinit vijnë në formë reagimi ndaj rrezikut të dukshëm të deindustrializimit me të cilin përballet ekonomia më e madhe europiane dhe bashkë me të gjithë Kontinenti i Vjetër, i cili sheh industritë e tij të joshen nga subvencionet e guximshme të paketës Biden, siç njihet ndryshe programi IRA. Por në veçanti, ekonomia më e madhe e Europës me industritë më konkurruese, Gjermania, po përballet me një realitet të zymtë: edhe industritë e saj historike po mendojnë të transferohen. Midis tyre prodhuesi ikonë i automjeteve Volkswagen, i cili ka “ngrirë” planin e tij për të krijuar një njësi të prodhimit të baterive për automjetet elektrike në Europën Lindore dhe i ka dhënë përparësi një fabrike të ngjashme në Amerikë.
Arsye është sigurisht 10 miliardë euro subvencione që vlerëson se mund të marrë nga e ashtuquajtura paketë Biden për kalimin në ekonominë e gjelbër. Në fund të fundit, presioni është intensifikuar nga Korporata Amerikane Intel e cila kishte rënë dakord me Berlinin për të ndërtuar një njësi të prodhimit të mikroprocesorëve në Magdeburg.
Marrëveshja parashikonte që shteti gjerman të subvenciononte kompaninë amerikane me 6.8 miliardë euro. Megjithatë, tani Intel është rikthyer me kërkesa të reja duke kërkuar nga qeveria gjermane subvencione shtesë prej 4 deri në 5 miliardë euro, duke përmendur shqetësimet ekonomike. Njësia e mikroprocesorit në fjalë është pjesë e një programi më të gjerë investimi që parashikon krijimin e një qendre të re brenda Europës.
Dorina Kurtaj /SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.