Greqia ‘mbytet’ nga turistët – Vendasit kërkojnë një kufi për numrin e vizitorëve!

Edel Strazimiri / SCAN

 

Të armatosur me shkopinj selfie dhe telefona, turistët vërshojnë në Santorini nga kudo. Disa e përballojnë nxehtësinë e pasdites për të gjetur një vend të mirë mes shtëpive të bardha dhe kishave me kube blu, ku më pas presin orë të tëra për të parë perëndimin e famshëm të ishullit grek. Ndërsa dielli bie, shumë të tjerë bashkohen me ta, duke u shtrydhur përgjatë shkëmbit ose në ballkone me kamerat gati.

Për shumë prej 20,000 banorëve të përhershëm të Santorinit, ishulli dikur idilik i fshatrave magjepsëse dhe plazheve të pacenuara është shkatërruar nga turizmi masiv.

Ndërsa protestat kundër turizmit të tepruar shpërthejnë në destinacione të tjera të njohura pushimi, duke përfshirë Venecia dhe Barcelonë, Santorini përfaqëson një nga shembujt më të shquar se si grumbullimi i vizitorëve mund të ndikojë në një vend.

Autoritetet në ishull janë bashkuar me pikat e tjera të nxehta të turizmit duke bërë thirrje për një kufi për vizitorët.

Numri në rritje i turistëve të huaj, rreth 3.4 milionë e vizituan ishullin vitin e kaluar, sipas kryebashkiakut Nikos Zorzos, po ushtrojnë presion mbi infrastrukturën e tij të vjetruar dhe po rrisin tej mase tarifat e banesave.

Zorzos thotë se ai ka nxitur autoritetet për vite që të mos lejojnë as edhe një shtrat të vetëm shtesë në ishull dhe ka propozuar një kufi në numrin e vizitorëve të anijeve turistike në 8,000 në ditë, nga rreth 17,000.

Edhe pronarët e bizneseve që përfitojnë nga turizmi janë të shqetësuar. Bumi turistik i Santorinit ka jehonë në të gjithë Greqinë. Të ardhurat kombëtare nga turizmi u rritën me 16% në pesë muajt e parë të këtij viti, tregojnë të dhënat dhe viti 2024 parashikohet të tejkalojë rekordin e vitit të kaluar prej 33 milionë mbërritjeve.

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.