Hungaria dhe Rusia në negociata për furnizimet me gaz pavarësisht sanksioneve të BE-së!
![](https://scantv.al/wp-content/uploads/2022/07/hungary-russia-765x383.jpg)
Qeveria e Hungarisë dëshiron të blejë afër një miliardë metra kub gaz natyror nga Rusia, pavarësisht sanksioneve të Bashkimit Europian, tha kryediplomati i saj përpara bisedimeve me homologun e tij nga Moska.
“Në situatën aktuale ndërkombëtare, gjëja më e rëndësishme për ne është të garantojmë sigurinë energjetike të Hungarisë,” tha Ministri i Jashtëm Péter Szijjártó në një konferencë shtypi në kryeqytetin rus të enjten. “Prandaj, do të doja të bisedoja sot dhe të biem dakord për rritjen e vëllimeve të gazit të furnizuar tashmë në Hungari nga Rusia.”
Partia konservatore në pushtet Fidesz kishte thënë më herët se Szijjártó do të udhëtonte në Rusi për të diskutuar dërgesat e reja të gazit. “Për të garantuar sigurinë e furnizimit me energji të Hungarisë, qeveria ka vendosur të blejë 700 milionë metra kub gaz natyror përveç sasive të parashikuara tashmë në kontratat afatgjata”, shkruan Fidesz në një postim në Facebook.
Kjo vjen vetëm një ditë pasi BE-ja paraqiti një plan për të reduktuar kërkesën europiane për gaz me 15% për të kapërcyer humbjen e furnizimeve ruse pas pushtimit të Ukrainës nga Kremlini më 24 shkurt. Ministri i Jashtëm rus Sergei Lavrov tha se kërkesa e Budapestit për gaz shtesë do të “përcillet dhe studiohet menjëherë”.
“Pavarësisht situatës së vështirë ndërkombëtare, pavarësisht dëshirës së disa prej partnerëve tanë për të rritur presionin e sanksioneve ndaj Rusisë, ndërveprimi ynë vazhdon”, deklaroi Lavrov përpara takimit të tij me Szijjártó.
Ministri i Jashtëm hungarez është i vetmi zyrtar i lartë nga një vend anëtar i BE që viziton Rusinë që nga fundi i shkurtit, duke ndaluar udhëtimin e kancelarit austriak Karl Nehammer në prill. Szijjártó do të zhvillojë gjithashtu bisedime me zëvendëskryeministrin rus Aleksandër Novak, zyrtari më i lartë rus i energjisë. Kryeministri hungarez Viktor Orbán ka kundërshtuar prej kohësh sanksionet ndaj sektorit energjetik të Rusisë dhe ka deklaruar se blloku “e ka qëlluar veten në mushkëri”.
Vendi anëtar i BE-së pa dalje në det aktualisht importon 65% të naftës dhe 80% të gazit natyror nga Rusia dhe shpalli një “gjendje të jashtëzakonshme” për shkak të ndërprerjeve të furnizimit javën e kaluar. Qeveria e Hungarisë tha se do të rrisë kapacitetet e saj vendase të prodhimit të energjisë për të siguruar furnizim adekuat.
Orbán ka dënuar pushtimin rus të Ukrainës, por ka fajësuar sanksionet për krizën aktuale të energjisë në vendin e tij. Të enjten, Lavrov njoftoi gjithashtu se Budapesti dhe Moska planifikojnë të zhvillojnë marrëdhënie “të qëndrueshme dhe strategjike”.
Rusia nuk do të lejojë që sanksionet europiane “të ndërhyjnë në bashkëpunimin tonë dhe ne do të kërkojmë zgjidhje për ta bërë bashkëpunimin tonë në të gjitha fushat të papërshkueshëm nga këto teka dhe përpjekje për ndëshkim”, shtoi ai.
Edel Strazimiri / SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.