India kalon Kinën për naftën ruse – Bëhet importuesi më i madh në botë

Kristi Ceta/SCAN

India kaloi Kinën për blerjen e naftës ruse, duke u bërë importuesi më i madh i saj në botë në muajin korrik. Rafinerët kinezë blenë më pak për shkak të marzheve më të ulëta të fitimit nga prodhimi i karburanteve, tregoi një krahasim i të dhënave të importit.

Nafta e papërpunuar ruse përbën një rekord prej 44% të importeve të përgjithshme të Indisë muajin e kaluar, duke u rritur në 2.07 milionë fuçi në ditë, 4.2% më e lartë se në qershor dhe 12% më shumë se një vit më pare.

Kjo tejkaloi importet e Kinës nga Rusia prej 1.76 milionë fuçi në ditë gjatë korrikut, bazuar në të dhënat e doganave kineze.

Rafinerët indianë kanë konsumuar naftën ruse të shitur me zbritje pasi vendet perëndimore vendosën sanksione kundër Moskës dhe kufizuan blerjet e tyre të energjisë si përgjigje ndaj pushtimit rus në Ukrainë.

Tregtia e Indisë me Rusinë është rritur që kur Rusia filloi luftën në shkurt 2022, kryesisht për shkak të importeve të naftës dhe plehrave, një lëvizje që ndihmon për të mbajtur një limit mbi çmimet globale dhe kontrollin e inflacionit.

Blerjet në rritje të Indisë po ndryshojnë rrjedhën e naftës së papërpunuar ruse ESPO Blend nga blerësit tradicionalë kinezë në Azinë Jugore. Sipas të dhënave, importet e ESPO në Indi u rritën në 188,000 fuçi në ditë, pasi u përdorën anije më të mëdha Suezmax.

Iraku vazhdoi të ishte furnizuesi i dytë më i madh i naftës në Indi muajin e kaluar, i ndjekur nga Arabia Saudite dhe Emiratet e Bashkuara Arabe.

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.