Italia, me krizën më të thellë demografike në Evropë – Tkurrja e popullsisë, shkalla e ulët e punësimit kërcënojnë ekonominë vendase

Kristi Ceta/SCAN

 

Demografia e Italisë është më e keqja në Evropë për sa i përket potencialit të rritjes ekonomike midis 2023 dhe 2040, tha Scope Ratings, me një popullsi që plaket me shpejtësi dhe përbën një kërcënim për financat e tendosura publike të vendit.

Vitin e kaluar, lindjet në Itali ranë për të 15-in vit radhazi, duke arritur një rekord të ri të ulët prej 379,000, numri më i ulët që nga bashkimi i vendit në 1861, treguan të dhënat zyrtare.

“Popullsia në moshë pune e Italisë është vendosur të shënojë një rënie pothuajse 19% midis 2023 dhe 2040, ulja më e madhe në Evropë, duke tejkaluar reduktimet e pritura në Gjermani, Spanjë (të dyja me 14%) dhe Francë (2%), sipas raportit.

Tkurrja e fuqisë punëtore në ekonominë e tretë më të madhe të eurozonës nënvizon “rëndësinë në rritje të reformave të tregut të punës për perspektivat ekonomike afatgjata të Italisë”, shtoi Scope Ratings.

Shkalla e punësimit në vend është tashmë më e ulëta në 27 vendet e Bashkimit Evropian. Vitin e kaluar 66.3% e italianëve mes moshës 20-64 vjeç kishin një punë, krahasuar me një mesatare të BE-së prej 75.3%, sipas të dhënave të Eurostat.

Situata është veçanërisht kritike për gratë, të cilat luftojnë për të kombinuar mëmësinë dhe punën. Banka e Italisë ka thënë se futja e më shumë grave në fuqinë punëtore është e domosdoshme për të mbështetur rritjen ekonomike afatgjatë dhe për ta bërë më të përballueshëm borxhin e vendit prej gati 3 trilion euro.

Ekonomia italiane ka qenë ndër më të ngadalshmet në zonën e euros që nga lançimi i monedhës së përbashkët në vitin 1999.

Një rikthim i fortë i rritjes nga pandemia Covid-19 u nxit nga stimujt e kushtueshëm të shtetit për rinovimet e shtëpive duke kursyer energji, por që tashmë është duke u shuar.

Muajin e kaluar instituti kombëtar i statistikave ISTAT rishikoi normën e rritjes për vitin 2023 në 0.7% nga 0.9% dhe Ministri i Ekonomisë i tha parlamentit se objektivi i këtij viti prej 1% mund të jetë i paarritshëm.

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.