KESH përfiton 6.2 mln euro nga tregtimi i energjisë – Korporata realizon disa procedura shitjeje dhe optimizimi

Situata hidrike ka favorizuar aktivitetin tregtar të Korporatës Elektroenergjetike Shqiptare, që deri në këtë periudhë të vitit ka kryer 2 tenderë për shitje energjie si dhe një sërë procedurash optimizimi.

Sipas të dhënave të përpunuara nga TV SCAN deri më tani KESH ka gjeneruar rreth 6.2 mln euro të ardhura. Pjesa më e madhe e tyre është gjeneruar nga procedurat e shitjes së energjisë, ku të ardhurat nga 2 procedurat e shtjes kapin vlerën e rreth 4.8 mln euro.

Në total, KESH shitur 80 mijë mWh energji, teksa çmimi varion sipas Lot-it nga 51 euro/mWh, që është më i ulti, në 86 euro/mWh, që është çmimi më lartë i shitjes.

Ndërkaq, pjesa tjetër e të ardhurave prej rreth 1.4 mln euro janë siguruar nga procedurat e optimizimit, që përfshijnë shitje dhe blerje të energjisë elektrike.

Realizimi i procedurave të shit-blerjes së energjisë synon përfitimin nga diferenca e çmimit të shitjes me atë të blerjes.

Kjo pasi, e njëjta sasi energjie blihet dhe shitet në profile të ndryshme orare. Ndërkohë që, referuar legjislacionit në fuqi blerja bëhet me çmim më të ulët se shitja, duke siguruar të ardhura shtesë për Korporatën Elektorenergjetike Shqiptare.

Paralelisht me këtë aktivitet, deri më tani nuk është raportuar asnjë procedurë blerjeje energjie.

Ola Mitre /SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.