Shqiptarët preferojnë celularët me kontrata – Në një “hap” me tendencën evropiane. Përdoret më shumë interneti nga telefoni

Shqiptarët po tërhiqen gjithnjë e më tepër nga lidhja e kontratave të pajtimit me paspagim me kompanitë telefonike, në vend të kryerjes së ofertave me parapagesë. Kjo ndodh për arsye se tarifat për shërbimin e internetit dhe të thirrjeve janë shpeshherë më të ulëta në kontrata se te paketat me parapagim.

Struktura e pajtimtarëve ka pësuar ndryshime, ku vihet re një rritje simetrike e blerjes së shërbimeve celulare përmes kontratave me paspagim, praktikë e cila aplikohet gjerësisht në vendet e rajonit dhe të Bashkimit Evropian. Ndërkohë që ka pasur një ulje me 62% të numrit të pajtimtarëve me parapagim nga 68% që ishte në vitin 2022.

Vitet e fundit vërehet një përqindje e lartë e qytetarëve të shteteve të BE-së që përdorin kontratat me paspagim dhe duket se kjo tendencë po përqafohet shumë edhe nga shqiptarët, të cilët kanë edhe një numër më të madh të kartave SIM në përdorim.

Referuar të dhënave nga AKEP, numri total i kartave SIM ishte 3.8 milionë gjatë vitit 2023, ndërkohë që numri i pajtimtarëve aktivë të shërbimeve celulare arriti rreth 2.6 milionë duke u ulur lehtë krahasuar me vitin pararendës. Një banor në vendin tonë përdor 1.4 karta SIM, kjo shifër tejkalon mesataren e zotërimit të kartave SIM në Evropë dhe botë, e cila shkon në 1.23 ose 1.11 karta SIM për banor.

Sa i takon volumit të thirrjeve dhe internetit, duket se qytetarët përdorin më tepër këtët të fundit. Volumi mesatar mujor i thirrjeve për përdorues ka shënuar rënie me rreth 14% duke arritur në 268 minuta thirrje hyrëse dhe dalëse, ndërsa volumi i konsumit mesatar mujor të internetit është rritur me përafërsisht 5% duke arritur në rreth 7.64 GB në muaj.

Ledina Elezi/SCAN

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.