Kina mbizotëron në sektorin e energjisë së erës dhe diellit – Kapaciteti i vendit dy herë më i madh se ai i pjesës tjetër të botës

Dorina Kurtaj /SCAN

Hulumtimet e publikuara nga organizata ‘Global Energy Monitor’ – GEM, treguan se Kina ka 180 gigavat energji diellore në ndërtim dhe 15 gigavat energji të erës. Kjo e çon kapacitetin total të erës dhe diellit në ndërtim në 339 gigavat, dukshëm më shumë se 40 gigavat në ndërtim në SHBA.

Studiuesit numëruan ferma diellore me një kapacitet prej 20 megavat ose më shumë, të cilat ushqehen direkt në rrjet. Kjo do të thotë se sasia totale e energjisë diellore në Kinë mund të jetë shumë më e lartë, pasi fermat e vogla diellore përbëjnë rreth 40 % të kapacitetit diellor të Kinës.

Gjetjet theksojnë pozitën udhëheqëse të Kinës në prodhimin global të energjisë së rinovueshme në një kohë kur SHBA-ja është gjithnjë e më e shqetësuar për kapacitetin e madh të Kinës veçanërisht në industrinë diellore.

Kina ka parë një boom të energjisë së rinovueshme në vitet e fundit, i nxitur nga mbështetja e fortë e qeverisë. Xi Jinping, presidenti kinez, ka theksuar nevojën për “forca të reja prodhuese cilësore”, një slogan që nënkupton dëshirën për të zhvendosur ekonominë e Kinës drejt teknologjisë dhe inovacionit.

Ndërmjet marsit 2023 dhe marsit 2024, Kina instaloi më shumë kapacitete të prodhimit të energjisë diellore sesa në tre vitet e mëparshme, dhe më shumë se pjesa tjetër e botës së bashku në 2023, zbuluan analistët e GEM.

Kina është në rrugën e duhur për të arritur 1200 gigavat kapacitet të instaluar të energjisë së erës dhe diellore deri në fund të vitit 2024, gjashtë vjet përpara objektivit të qeverisë. Vala e ndërtimit garanton se Kina do të vazhdojë të kryesojë në instalimin e kapaciteteve për përdorimin e energjisë së erës dhe diellit në të ardhmen e afërt, shumë më përpara se pjesa tjetër e botës, sipas raportit të “The Guardian”.

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.