“Konsumatorët presin ekonomi të dobët në të ardhmen” – Bie me 1.1 pikë treguesi i ndjesisë ekonomike. Me rritje vetëm tregtia dhe shërbimet
![](https://scantv.al/wp-content/uploads/2023/12/EKONOMIA-765x383.jpg)
Konsumatorët e shohin me pesimizëm gjendjen e ekonomisë së vendit në të ardhmen, kjo ndikuar edhe nga situata e tyre aktuale financiare, aftësia blerëse në shuma të mëdha dhe pritshmëria për një nivel më të lartë papunësie.
Sipas vrojtimit më të fundit të Bankës së Shqipërisë mbi besimin e biznesit dhe konsumatorit, treguesi i ndjesisë ekonomike ka pësuar një ulje prej 1.1 pikësh në muajin maj. Kjo rënie ka ardhur si rrjedhojë e niveleve më të ulëta të besimit në sektorët e industrisë, të ndërtimit dhe të konsumatorëve. Treguesi i besimit konsumator regjistroi rënie me 4.9 pikë përqindje në muajin maj, duke ndërprerë prirjen rritëse të dy muajve të fundit dhe duke qëndruar pranë nivelit të mesatares historike.
Një rënie të lehtë me 0.6 pikë përqindje ka shënuar treguesi i besimit të industrisë në muajin maj. Niveli i tij qëndron aktualisht 6.4 pikë përqindje mbi mesataren historike. Kjo rënie erdhi si rezultat i vlerësimeve më të ulëta për prodhimin industrial aktual. Gjithashtu edhe niveli i porosive nga bizneset është ulur lehtë. Ndërkohë, këta të fundit presin që prodhimi industrial në të ardhmen të shënojë rritje. Pritjet për çmimet në të ardhmen u ulën në krahasim me muajin e kaluar.
Treguesi i besimit në ndërtim vijoi një prirje të lehtë rënëse për të tretin muaj rresht, por niveli i tij qëndron 20 pikë mbi mesataren historike dhe pranë maksimumit histori. Rënia u përcaktua kryesisht nga vlerësimet në rënie për aktivitetin aktual ndërtues. Megjithatë, porositë aktuale janë vlerësuar me rritje. Pritjet për çmimet që do të vendosin në të ardhmen kanë regjistruar rritje të lehtë këtë muaj.
Nga ana tjetër, besimi në sektorët e shërbimeve dhe të tregtisë kanë shënuar rritje. Pritjet më optimiste për punësimin në të ardhmen kanë ndikuar në rritjen me 1.3 pikë përqindje të treguesit të besimit në tregti në muajin maj. Vlerësimet për ecurinë aktuale të biznesit qëndruan në nivel të njëjtë me muajin e kaluar, ndërsa parashikohet një rritje e cmimeve në vijim.
Vlerësimet më optimiste të bizneseve për ecurinë aktuale të aktivitetit të tyre dhe nivelin e kërkesës, kanë kontribuar në ngjitjen me 2.1 pikë përqindje të treguesit të besimit në shërbime. Pritjet për kërkesën dhe nivelin e punësimit në të ardhmen janë rritur këtë muaj, ndërkohë që mund të ketë një ulje të çmimeve nga bizneset në vazhdim.
Ledina Elezi/SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.