Korçë-Ersekë, modifikim projekti – ARRSH ndryshon edhe kontratën për lotin II, 432.2 mln lekë shtesë

Ola Mitre / SCAN

 

Projekti për ndërtimin e rrugës Korçë – Ersekë është rishikuar, teksa kontrata është modifikuar duke shtuar kostot për realizimin e punimeve të reja në terren. Autoriteti Rrugor Shqiptar ka njoftuar rritjen e vlerës së përgjithshme të kontratës për ndërtimin e pjesës 2, të lotit II me rreth 432.2 mln lekë, pa TVSH, teksa vlera e përgjithsme së bashku me tenderin fillestar ka shkuar në rreth 2.6 mld lekë, pa TVSH.

ARRSH nuk ka hapur tender të ri për punimet shtesë, por ato do të realizohen nga kompania ANK, që ka qenë fituese e projektit fillestar, duke argumentuar se kjo formë rezulton më pak e kushtueshme. Gjithashtu, kontrata shtesë nuk kalon 20% të vlerës së kontratës bazë, që është pragu i lejuar nga legjislacioni në fuqi për modifikimin e kontratave. Autoriteti kontraktor vlerëson se kostoja e përgjithshme e punimeve shtesë është 19 %.

Sa i takon ndryshimeve të projektit, në dokumente thuhet se është kryer rishikim i projektit të urës mbi përroin e Selenicës, pasi gjatë zbatimit rezultoi se ura e parashikuar në projektin e tenderuar nuk e mbulonte gjerësinë e shtratit të lumit, i cili në periudha të ndryshme të vitit zgjeron shtratin e tij.

Po ashtu, është kryer rishikim i projektit në lidhje me përmirësimin e tabanit të rrugës për shkak se gjatë zbatimit të punimeve është hasur prezencë e ujërave në thellësinë e gërmimit 2.5 – 3 m.

Shkak për modifikimin e kontratës është bërë edhe ndryshimi i volumeve për shkak të mospërputhjes së projektit me faktin në terren, si dhe mospërputhje e projektit me preventivin. Modifikimi i kontratës është firmosur në 30 gusht, ndërsa afati për përfundimin e punimeve ka shkuar në 22 muaj, nga 18 muaj që ishte afati fillestar.

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.