Kosova pret bashkatdhetarët – Nga 1 korriku, polica kufitare është falas

Duke nisur nga dita e sotme, 1 korrik, të gjithë emigrantët që punojnë dhe jetojnë jashtë Kosovës dhe që kthehen në vendin e tyre për pushimet verore nuk do të paguajnë policën kufitare të sigurimit.

Dy ditë më parë është nënshkruar marrëveshja, sipas së cilës vlera e kësaj police do të subvencionohet nga buxheti i shtetit.

Polica e subvencionuar do të ketë vlefshmëri një muaj nga dita e lëshimit apo hyrjes në Kosovë dhe është e vlefshme vetëm për automjetet jo-komerciale për pasagjerë, deri në 9 vende.

Subvencionimi nuk përfshin policat kufitare me afat vlefshmërie të ndryshëm prej atij një mujor dhe as automjetet si autobusët, kamionët, motoçikletat etj. Policat e sigurimit të marra në zyrat e Byrosë Kosovare të Sigurimit brenda territorit të vendit, e jo në pikat hyrëse kufitare, nuk mbulohen nga subvencionimi.

Kjo iniciativë e Qeverisë ka për qëllim lehtësimin e udhëtimeve për bashkatdhetarët që vizitojnë vendin gjatë sezonit veror.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.