Sa euro bleu BSH për të frenuar forcimin e lekut? – Në tremujorin e parë të vitit u zhvilluan 3 ankande për 32.60 mln euro

Në tre muajt e parë të këtij viti, Banka e Shqipërisë ka blerë 32.60 milionë euro, me qëllim rritjen e rezervës valutore për stabilizimin e kursit të këmbimit. Prej disa muajsh, kursi i këmbimit është shoqëruar me luhatje të mëdha, për shkak të forcimit të lekut dhe dobësimit të monedhës evropiane.

Banka Qendrore ka zhvilluar tre ankande për blerjen e valutës, ku dy prej tyre janë zhvilluar me marrëveshje forward, pra përmes një marrëveshjeje paraprake për blerjen e euros në një datë të ardhshme dhe me një kurs këmbimi të përcaktuar që në momentin e arritjes së kësaj marrëveshjeje, si dhe një ankand i llojit SPOT, pra me blerje sipas kursit të këmbimit në datën që është mbajtur ankandi.

Në ankandet e zhvilluara në janar dhe në shkurt janë blerë gjithsej 26.8 milionë euro, shumë që mbetet rreth mesatares së vitit 2023. Megjithatë, si rezultat i pjesëmarrjes së ulët në ankandin e tretë, në muajin mars do të bliheshin vetëm 5.8 milionë euro.

Rezerva valutore shërben për të realizuar nevojat e qeverisë për valutë për shlyerjen e borxhit të jashtëm, mbështetur tregtinë ndërkombëtare, duke përmbushur kërkesën për valutë që buron nga importuesit, si dhe mundësuar ndërhyrjen e Bankës së Shqipërisë në treg, me qëllim parandalimin dhe zbutjen e lëvizjeve të forta të kursit të këmbimit.

Pavarësisht ndërhyrjeve në tregun e brendshëm valutor, monedha evropiane zbriti poshtë kufirit të 100 lekëve në muajin maj dhe qershor.

Deri në fund të këtij viti, Banka e Shqipërisë synon të blejë përmes ankandeve rreth 250-330 milionë euro. Si pasojë e fluksit të lartë të turistëve, pritet që gjatë këtyre muajve të verës të ketë një prani më të madhe të eurove në treg, e për rrjedhojë parashikohet që Banka e Shqipërisë të realizojë blerjen më të madhe të këtij viti në muajin gusht, me qëllim tërheqjen e sasisë së lartë të eurove në vend dhe forcimin e lekut.

Ledina Elezi/SCAN

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.