Londra përpiqet të shesë shtëpitë luksoze – Oferta të “çmendura” për të joshur blerësit

Komoditetet e ofruara në komplekset e reja rezidenciale ultraluksoze në Londër po bëhen gjithnjë e më ekstravagante, teksa konkurrenca për të tërhequr klientët ka “shpërthyer”. Një pishinë me madhësi hoteli, një palestër dhe një pritje 24 orëshe nuk mjaftojnë më për të bindur ultra të pasurit të blejnë një shtëpi. Kështu, kompanitë e zhvillimit të pasurive të paluajtshme ofrojnë shërbime edhe më të “avancuara”, si aksesi në grupe të mbyllura anëtarësh elitarë, shërbime botox përmes aplikacioneve celulare dhe shërbime të transportit të përditshëm të fëmijëve për në shkollat e tyre.

Është një përpjekje e fundit nga kompanitë e menaxhimit të pronave pasi shitjet e shtëpive luksoze në kryeqytetin britanik ngadalësohen dukshëm. Një raport i fundit nga firma e të dhënave të pronave LonRes tregoi se shitjet e shtëpive me vlerë më shumë se 5 milion paund ranë me të paktën 20% në maj nga viti në vit. Si rrjedhojë, ishte maji më i keq për blerjet e pronave të kësaj vlere që nga viti 2017, jashtë periudhës së pandemisë. Shtesat tani janë aq të zakonshme në mesin e kompanive të pasurive të paluajtshme saqë blerësit e interesuar i presin ato dhe i marrin parasysh kur blejnë shtëpi, veçanërisht në ndërtesa të reja.

Fokusi në shëndetin dhe stilin e jetës është rritur ndjeshëm, veçanërisht pas pandemisë. Është një nevojë që kompanitë e pasurive të paluajtshme duhet të plotësojnë aktualisht për të qëndruar të rëndësishme dhe të dëshirueshme në mesin e konkurrencës.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.