Masat shtrënguese po kthehen në Europë – Belgjika, Greqia, Spanja, Franca dhe Italia ‘në rrezik’

Autoriteti mbikëqyrës këshillimor i Komisionit Europian ftoi vendet e BE-së me borxhe të tepërta të frenojnë shpenzimet e mëdha, si dhe tkurrin deficitet e tyre, të cilat u vlerësuan si të tepërta. Në një raport, Bordi Fiskal Europian – EFB tha se pesë vendet e Eurozonës që konsiderohen ‘me rrezik të lartë në afat të mesëm’, përkatësisht Belgjika, Greqia, Spanja, Franca dhe Italia, duhet të bëjnë më shumë për të riparuar financat e tyre.

Vendet në fjalë “duhet të shfrytëzojnë rastin për të bërë një përpjekje shtesë për të ulur deficitet e tyre fiskale. Politikat kombëtare fiskale duhet të trajtojnë hendekun e shpenzimeve, duke mbrojtur investimet”, theksuan zyrtarët e këshillit.

Raporti thekson se nevoja për veprim është më urgjente sesa kur u krijua këshilli në 2016-ën për të propozuar reforma pas krizës së borxhit të rajonit. Misioni i tij kryesor është të kontribuojë në ushtrimin e detyrave të komisionit në kuadër të mbikëqyrjes fiskale shumëpalëshe të eurozonës.

Publikimi i ri përkon me shqyrtimin e financave të Francës në një kohë kur zgjedhjet e së dielës mund të çojnë në rezultate që, sipas një raporti nga ‘Scope Ratings’, mund të ushtrojnë presion mbi regjimin financiar të vendit. Ndër rreziqet më të gjera, përmendet “ngrirja” e mundshme e nismave europiane, por edhe një goditje të mundshme ndaj rregullave të reja fiskale të BE-së.

“Në përgjithësi, EFB e konsideron të përshtatshëm një stimul fiskal mjaft kufizues në vitin 2025”, thuhet në raport. “Kjo do të ndihmonte gjithashtu në ruajtjen e vlerësimit relativisht të favorshëm të rreziqeve sovrane nga tregjet financiare.”

Raporti shpreh zhgënjim që deficitet në disa vende anëtare të Eurozonës do të jenë më të mëdha se sa pritej dhe thekson se kjo është për shkak të pritshmëritë të votuesve dhe reagimeve të politikave.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.