Mazhorancë historike për laburistët në Britani – Starmer, kryeministri i ri i vendit shpall fitoren

Mbretëria e Bashkuar shënon një kthesë majtas, pas 14 vitesh qeverisje dhe lëkundjesh të konservatorëve. Në zgjedhjet e parakohshme të vendit, partia laburiste ka marrë 410 vende në Ëestminster kundrejt 131 të konservatorëve. Në rezultatet e publikuara nga BBC, konfirmohet si forcë e tretë në vend ajo e liberaldemokratëve me 61 vende të ndjekur nga e djathta e Reform UK me 13 vende dhe partia skoceze me 10 vende.

Kryeministri konservator Rishi Sunak, i cili uroi liderin laburist për fitoren, humbi sfidën personale kundrejt Keir Starmer, i cili ishte shpallur fitues nga sondazhet. Për konservatorët bëhet fjalë për një humbje historike. Kryesisht për shkak të skandaleve të lidhura me Brexit, përcarjeve të brendshme, politikës ekonomike dhe premtimeve të dështuara për emigracionin. Por dhe për arsye të jashtme si krizat globale, pandemisë, pasojat e luftës Rusi – Ukrainë dhe përshkallëzimit të situatës në Lindjen e Mesme.

Pra Starmer do të bëhet kryeministër dhe mund të formojë një qeveri të shumicës. Laburistët arrijnë fitoren historike duke u rikthyer në pushtet pas 14 vitesh qeveri konservatore. Më e fortë se ajo e Tony Blair, në vitin 1997, pasi pas pesë kryeministrave konservatorë, Brexit, masave shtrënguese, krizës në fuqinë blerëse dhe përkeqësimit të sistemit shëndetësor publik, konservatorët pësuan një humbje masive, dërrmuese, duke u përballur me pakënaqësinë e popullit britanik.

Nigel Farage, kreu i partisë së ekstremit të djathtë Reforma në Mbretërinë e Bashkuar, fitoi një vend në Parlamentin Britanik për herë të parë.

Retorika e tij kundër imigracionit dhe fushata për Brexit e kanë bërë Farage një nga politikanët më të njohur dhe më të diskutueshëm në Britani, por ai ja doli të zërë një vend në Westminster vetëm pas shtatë përpjekjeve të dështuara radhazi.

Viktimë e humbjes së Partisë Konservatore në zgjedhjet britanike ra edhe ish-kryeministrja Liz Truss. Truss, e cila u pasua nga Rishi Sunak, nuk arriti të sigurojë një vend si deputete.

Dorina Kurtaj /SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.