Plani, në 2025 Eurobond 650 mln euro për nevojat e buxhetit – Do jetë i shtati në historinë e eurobondeve që ka marrë Shqipëria
![](https://scantv.al/wp-content/uploads/2023/04/finance-strategjia-751x383.jpg)
Për të mbuluar nevojat, duke përfshirë marrjen e borxheve të mëparshëm dhe nevoja që ka buxheti I shtetit Shqipëria do të rikthehet në tregjet ndërkombëtare vitin e ardhshëm me një emetim të ri eurobondi në vlerë prej 650 milionë eurosh.
Sipas Rishikimit të Fundit të Kuadrit Makroekonomik dhe Fiskal për periudhën 2025-2027, planifikohet të tërhihen dy borxhe: një në vlerë 650 milionë euro dhe një tjetër në vlerë 540 milionë euro.
Ministria e Financave ka reduktuar planet e saj nga tre në dy eurobonde gjatë këtyre tre viteve (2025-2027), krahasuar me parashikimet e mëparshme. Pas zvogëlimit të inflacionit, bankat qendrore po zbutin politikat monetare me uljen e normave bazë të interesit, duke bërë që borxhi të jetë më i favorshëm në krahasim me atë të emëtuar më parë.
Megjithatë, ekspertët vlerësojnë se situata në tregjet e huaja ende nuk është e qetësuar. Ky eurobond i ri do të jetë i shtatë në serinë e eurobondeve të vendit, pasi deri më tani janë marrë në tregjet e huaja gjashtë eurobonde me një vlerë të përgjithshme prej 3.2 miliardë euro.
Borxhi publik aktual i Shqipërisë është reduktuar në 58.2% të Prodhimit të Brendshëm Bruto dhe pritet të ulet më tej në 55% deri në vitin 2027, megjithatë kostoja e shlyerjes së tij është rritur për shkak të interesave të larta në vite të fundit. Në vetëm 5 muajt e parë të vitit të tanishëm, janë paguar afro 220 milionë euro për interesat e borxhit, një shifër që shënon një rekord historik.
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.