Më shumë interes për trashëgiminë kulturore – Në total janë mbi 875 mijë vizitorë. Parqet Arkeologjikë kryesojnë me turistë

Diamila Leka/ Scan

Shifrat e turistëve që tregojnë interes për trashëgiminë tonë kulturore po rriten nga muaji në muaj. E kësisoj, referuar shifrave për vizitorët në sitet tona kulturore kanë shënuar një rritje të konsiderueshme prej 36% për periudhën tetë mujore, janar-gusht, krahasuar me të njëjtën periudhë të vitit 2023. Të gjitha muzetë, kalatë, parqet arkeologjike si dhe monumentet kulturore, kanë mirëpritur 875,315 vizitorë gjithsej në tetë muaj këtë vit.

Por për çfarë tregojnë interes më shumë turistët për të vizituar në sitet kulturore?

Sipas të dhënave, më shumë interes kanë treguar për Parqet Arkeologjike, duke arritur në 340,296 vizitorë ose 30% më shumë krahasuar me vitin 2023. Të dytët për nga renditja e vizitorëve janë Muzetë Kombëtarë me 302,384 vizitorë, ose 26% më shumë krahasuar me të njëjtën periudhë të vitit të kaluar. Ndërkohë në vendin e tretë janë Kalatë dhe Monumentet Kulturore të cilat janë vizituar nga 232,635 shtetas, ose 30% më shumë krahasuar me vitin 2023.

Ndërkohë, pak ditë më parë Ministri i Ekonomisë Kulturës dhe Inovacionit Blendi Gonxhja theksoi se të gjitha trashëgimitë kulturore do të restaurohen. Sipas tij, do të ketë një menaxhim më të mirë dhe se investimet kanë nisur. Deri më tani janë rreth 373 milionë lekë investime nga buxheti i ministrisë dhe Institutit të Trashëgimisë Kulturore.

 

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.