Ndërtimi i hekurudhës Tiranë-Rinas-Durrës – Zv/kryeministrja Balluku inspekton punimet: Në nëntor nis ndërtimi i stacioneve
Diamila Leka/ Scan
Zëvendëskryeministrja, njëherësh Ministre e Infrastrukturës dhe Energjisë Belinda Balluku ka inspektuar punimet në kantierin e hekurudhës Tiranë- aeroporti “Nënë Tereza”- Durrës.
“Po bisedonim pak më parë përsa i përket shpejtësisë që do ketë kjo linjë. Kjo linjë do ketë një shpejtësi prej 120km/h mesatarisht. Kemi avancuar për një sërë komponentësh të projektit, sepse projekti Tiranë-Rinas-Durrës, ka disa komponentë. Pra nuk është thjeshtë traseja, të cilën po ecim me një shpejtësi të mirë të qëndrueshme dhe të konsiderueshme. Rreth 80% e proceseve janë të bëra, nga ana tjetër jemi edhe duke avancuar edhe me komponentët e tjerë, siç është pjesa e stacioneve,” tha ajo.
Ndërkohë që gara e stacioneve ka përfunduar dhe është një fitues por që në nëntor do të nis ndërtimi i stacioneve dhe mbyllja e trasesë.
Ergys Verdho Drejtor i Hekurudhës Shqiptare: “E rëndësishme është që në nëntor fillon puna për ndërtimin e stacioneve dhe ato do përqëndrohen në pjesën e kabinave të sinjalistikës dhe telekomunikacionit, për shkak se ky komponent ndërthuret me trasenë, me futjen e të gjithë sinjalistikës në këto ndërtesa.”
Një komponent i rëndësishëm i projektit të hekurudhës është dhe elektrifikimi.
“Elektrifikimi që është shumë i rëndësishëm, ne e kemi bërë punën paraprake. Dhe pritet të hapet gara ndërkombëtare në dhjetor. Në dhjetor ne kemi garën ndërkombëtare për elektrifikimin e hekurudhës dhe ne kemi komponentin e fundit i cili ka të bëjë me operimin e hekurudhave”, tha Balluku.
Sipas Ballukut në periudhën 2025-2030 do të jetë fokus ngritja e kapaciteteve njerëzore, nga ku do duhet t’i përgjigjen nevojave si operimi, mirëmbajtja, planifikimi etj., pasi projektet hekurudhore do të jenë në shtim.
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.