Nis “lufta” e shezlloneve në Itali – Operatorët, në grevë për të mbrojtur koncesionet fitimprurëse

Dorina Kurtaj / SCAN

 

Italianët që do të shkojnë në plazhe në javët e ardhshme mund të përballen me probleme pasi bizneset e qiramarrjes së shezlloneve kërcënojnë të hyjnë në grevë pasi u detyruan të braktisin koncesionet e tyre fitimprurëse.

Dy nga shoqatat e biznesit të industrisë thanë se planifikojnë të mbyllin objektet e tyre dhe çadrat me qira për 2 deri në 4 orë në disa ditë në gusht për të rritur presionin ndaj qeverisë së kryeministres Georgia Melonit.

Shoqata Italiane e Biznesit të Plazheve u shpreh se njerëzit kanë besim te ligjet e shtetit që thoshin ‘investoni sa të doni’ dhe tani janë përballë një qeverie që ka premtuar gjithçka dhe nuk ka bërë asgjë.

Prej vitesh, presioni është rritur nga Brukseli që Italia të tërheqë 30.000 koncesionet e saj të menaxhimit të plazheve – të dhëna dekada më parë për një vlerë të vogël – dhe t’i rishpërblejë ato përmes një procesi konkurrues.

Megjithatë, pronarët e koncesioneve – të cilat variojnë nga kasollet me shezlong dhe çadra deri te restorantet dhe hotelet e nivelit të lartë – përfaqësojnë një grup politik me ndikim që i reziston fuqishëm konkurrencës.

Komisioni Europian nisi procedurat e shkeljes kundër Italisë në vitin 2020 pasi qeveria e udhëhequr atëherë nga Lëvizja populiste Pesë Yjet miratoi një ligj që zgjati koncesionet deri në vitin 2033.

Në përpjekje për të zgjidhur mosmarrëveshjen, qeveria e ardhshme, nën drejtimin e Mario Draghit, ra dakord t’i jepte fund të gjitha koncesioneve ekzistuese dhe të zhvillonte ankande për të reja në fund të vitit 2023. Por qeveria e tij u shemb para se ai të mund të zbatonte reformat.

Pasi erdhi në pushtet, Meloni zgjati vlefshmërinë e koncesioneve ekzistuese deri në fund të vitit 2024. Qeveria e saj gjithashtu hartoi 7.900 km vijë bregdetare të Italisë në një përpjekje për t’i provuar Brukselit se ka shumë plazhe të lira dhe se nuk ishte e nevojshme të anuloheshin koncesionet ekzistuese. Komisioni hodhi poshtë pretendimin e Romës dhe i kërkoi qeverisë Meloni të vazhdonte me reformën e premtuar.

Bashkitë, të cilat kanë lëshuar historikisht koncesione, po përgatisin secila tenderë të rinj, si dhe po hartojnë politika kompensimi për sipërmarrësit që do të humbasin koncesionet e kahershme.

Por sipërmarrësit e plazheve po kërkojnë që Meloni të miratojë një politikë kombëtare që garanton ekuivalentin e të paktën dy viteve të qarkullimit të tyre vjetor si kompensim për biznesin e tyre të humbur.

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.