Nisin fluturimet direkte nga Aerodromi i Gjirokastrës – Shërbim polici- doganë, Kotzageridis: Promovim aviacionit civil

Alida Lula /SCAN

 

Gjirokastra është një nga qendrat më të rëndësishme të turizmit kulturor gjithëvjetor, me një rritje të vizitorëve nga viti në vit. Aerodromi i Gjirokastrës është kthyer tashmë në qendër të avioturizmit.

Pas pothuaj 90 vitesh, 6 avionë sportivo-turistik të mbërritur nga aeroportet e Sibari, Barit dhe Brindizi të Italisë, janë ulur në aerodromin e Gjrokastrës, i cili është i vetmi i certifikuar në vendin tonë, për uljen e këtyre avionëve. Shërbimi polici-doganë, shmang uljen e detyruar në aeroportin e Rinasit.

Fluturimet ndërkombëtare, tashmë janë pjesë e bashkëpunimit të firmosur me akte binjakëzimi. Këshilltari special i drejtorit të Autoritetit të Aviacionit Civil, Miltiadis Kotzageridis, ka thënë për SCAN tv se promovimi i aviacionit civil në Shqipëri dhe sigurimi i aksesit në hapësirën ajrore i të gjithë përdoruesve të saj, është një nga objektivat strategjikë.

“Kjo iniciativë e riaktivizimit të Aerodromit të Gjirokastrës, do të sjellë turizëm cilësor. Bashkia e Gjirokastrës do të ketë mbështetjen maksimale të qeverisë qendrore për të patur gjithë benefitet” – ka thënë ndër të tjera Kotzageridis.

Për pilotët italianë ky aerodromi tashmë i plotëson të gjitha kushtet.

“Pista ka kushte optimale. Jemi në fund të muajit tetor dhe Gjirokastra është plot me turistë. Unë erdha nga Italia me këtë fluturim direkt për 1 orë e 25 minuta. Tashmë duhet vetëm të bëhet vijëzimi dhe të ketë një pikë karburanti”- thotë një prej pilotëve italianë.

Vendosja në funksionim e këtij aerodromi, sipas kryetarit të bashkisë Gjirokastër Flamur Golemi ka ndikim të rëndësishëm në jetën social-ekonomike të rajonit të Gjirokastrës.

“Është një lajm i mirë. Nënshkruam marrëveshjen me Sibari FLY, ACAA dhe Skydive, Federatën e Aeronautikës. Kemi gjithashtu interes nga Aero Club Bari dhe Brindizi ku kishim edhe disa pilotë të ardhur. Tashmë do të vijojmë me iniciativën e qeverisë shqiptare për projektin final, atë të ndërtimit të aeroportit tonë” – thotë kryebashkiaku Golemi.

Aerodromi i Gjirokastrës ndodhet në një distancë prej më pak se 1 km nga ana lindore e qytetit dhe shumë afër rrugës nacionale. Ai ka një histori gati njëshekullore, ku fluturimet e rregullta në të, kanë nisur zyrtarisht në vitin 1929 me linjën ajrore Tiranë-Gjirokastër-Tiranë.

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.