Plan për të vendosur tarifa në dyqanet online kineze – Objektiv: Frenimi i importit të produkteve të lira me cilësi të ulët

Dorina Kurtaj / SCAN

Brukseli po harton plane për të vendosur taksa doganore për mallrat e blera nga shitësit kinezë në internet, duke përfshirë Temu dhe Shein, në një përpjekje për të frenuar importet masive të produkteve të tilla, të cilat Komisioni i përshkruan nën standardet e duhura.

Komisioni Europian pritet të propozojë gjatë këtij muaji heqjen e pragut aktual prej 150 euro nën të cilin nuk vendoset tarifa. Sipas gazetës britanike, platformat kryesore të blerjeve në internet të synuara nga kjo masë e re janë tregjet online të Kinës Temu dhe AliExpress dhe shitësi me pakicë i veshjeve Shein.

Një masë e mundshme do të ishte bërja e detyrueshme e regjistrimit elektronik për pagesat e TVSH-së për platformat e mëdha, pavarësisht nga vlera e tyre. Sipas rregulloreve aktuale të BE-së, paketat e blera online nga një vend jo anëtar i BE-së nuk i nënshtrohen detyrimeve doganore nëse vlera e tyre është nën 150 euro.

Dy miliardë pako me një vlerë të deklaruar prej më pak se 150 euro arritën në BE nga vendet e treta në vitin 2023, sipas Komisionit, i cili thotë se vëllimi i madh i tregtisë elektronike po i shtyn autoritetet doganore në kufijtë e tyre.

BE ka diskutuar heqjen e kufirit si pjesë e një plani të reformës doganore të propozuar nga Komisioni në maj 2023, por tani mund të kërkojë të përshpejtojë miratimin e tij për t’u përballur me një rritje shumë të madhe të importeve të tilla të lira.

Reagime ka pasur edhe në SHBA. Atje, kritikët e Shein dhe Temu janë ankuar tashmë se dy kompanitë po përdorin përjashtimin nga taksat e importit për të larguar konkurrentët nga tregu. Kjo praktikë e detyrimeve doganore zero i ndihmon dy kompanitë të dërgojnë fustane për vetëm 8 dollarë dhe orë inteligjente për 25 dollarë për blerësit në mbarë botën. Importet e produkteve të tregtisë elektronike janë më shumë se dyfishuar nga viti në vit.

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.