Presidenti kthen për rishqyrtim ligjin “Për inspektimin” – Argumenti: Ndryshon 68 ligje të tjera, që nuk i janë nënshtruar procedurës së rregullt

Ledina Elezi/SCAN

 

Presidenti i Republikës, Bajram Begaj ka kthyer për rishqyrtim ligjin më të fundit për inspektimin. Në dekret theksohet se neni 68 deri në atë 124 ndikojnë në ndryshimin e 68 ligjeve të tjera, pasi në përmbajtjen e këtyre të fundit kanë dispozita zbatuese të inspektimit.

Pra, problemi qëndron në faktin se ligji për inspektimin do të shoqërohet me ndryshimin e 68 ligjeve të tjera, duke shkaktuar kështu një “lëmsh ligjor” dhe probleme në zbatimin e tyre, pasi bashkimi mekanik i disa ligjeve me natyra dhe objekt të ndryshëm në një ligj të vetëm krijon shumë paqartësi. Gjithashtu, përditësimi i ligjeve të tjera nga institucionet e shumta që preken prej modifikimeve të shkaktuara nga ky ligj mund të mos bëhet në mënyrë uniforme për shkak të kësaj paqartësie.

Sipas Presidencës, ndryshimi i 68 ligjeve nuk i është nënshtruar procedurës së rregullt që parashikon Rregullorja e Kuvendit për pranimin e nismave ligjbërëse dhe shqyrtimin e projektligjeve. Për këto 68 ligje nuk ka nismë ligjbërëse formale, regjistrim të projektligjeve në programin e punës së Kuvendit, nuk ka konsultim publik, procedurë të vecantë shqyrtimi, mendim të shprehur nga qeveria për secilën prej ligjeve, nuk ka analizë të kostos financiare dhe deklarim nga qeveria që pranon mbulimin e kostove financiare për secilin prej tyre, si dhe nuk ka raporte të vecanta vlerësimi nga komisionet përgjegjëse të Kuvendit, sipas fushave që mbulojnë 68 ligjet.

Nga ligji për inspektimin pritej një ulje e numrit të inspektimeve në subjektet e inspektimit, gjë e cila sjell dhe uljen e barrës administrative si në kosto dhe në kohë, rritjen cilësore të procedurës së inspektimit, si dhe rritjen e konkurrueshmërisë.

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.