Prezantohet Strategjia Afatmesme e të Ardhurave 2024-2027 – Ministri Malaj: Drafti i strategjisë është konsultuar me BE dhe FMN

Hamit Yzeiraj/ SCAN

 

Ministri i Financave, Petrit Malaj ka prezantuar para Këshillit Tatimor Strategjinë Afatmesme të të Ardhurave, 2024-2027. Kreu i dikasterit të financave u tha anëtarëve të Këshillit Tatimor se drafti i Strategjisë është konsultuar dhe dakordësuar me Bashkimin Europian dhe Fondin Monetar Ndërkombëtar. Po ashtu ai ka bërë të ditur se strategjia nuk parashikon ndryshim të normave tatimore ndonëse synon rritjen e nivelit të mbledhjes së të ardhurave.

“Është një strategji e cila nuk parashikon ndryshime të normave tatimore, garanton një stabilitet fiskal për tatimpaguesit dhe ka si objektiv kryesor rritjen e të ardhurave me rreth 65 miliardë lekë deri në fund të vitit 2027 ose 2.5 % të Prodhimit të Brendshëm Bruto krahasuar me vitin 2019”.

Po si do të bëhet rritja e të ardhurave pa rritur taksat. Ministri Malaj ka dhënë shpjegimin e tij duke theksuar se në radhë të parë do të rishikohen  përjashtimeve apo normave të reduktuara të tatimeve të direkte dhe indirekte. Kjo përbën shtyllën e parë të strategjisë. Shtylla e dytë është lufta kundër informalitetit.

“Komponent kryesor i kësaj shtylle është edhe dixhitalizimi i plotë i sistemit të fiskalizimit, duke përfshirë edhe inteligjencën artificiale, në mënyrë që të rrisim deklarimet si dhe të ulim informalitetin. Normalisht nëpërmjet këtyre instrumenteve ne do të rrisim edhe profilizimin e riskut për tatimpaguesit, si dhe do të mundësohet investigimi i rasteve të shmangies tatimore”.

Në betejën me informalitetin strategjia përcakton përmirësimin e administrimin tatimor, reduktimin e punës së padeklaruar, reduktimin e pagave të nëndeklaruara dhe uljen e qarkullimit të parasë cash në ekonomi. Një shtyllë më vete e strategjisë është edhe mirëadministrimin doganor, i cili do të arrihet kryesisht me anë të digjitalizimit të proceseve të punës.

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.