Publikohen të dhënat-Çfarë tregon CENSI 2023 për Shqipërinë

2 milionë e 412 mijë e 113 banorë! Ky është numri zyrtar i popullsisë së banon në Shqipëri. Shifra u bë publike nga vetë drejtuesja e INSTAT në ceremoninë e posaçme të mbajtur me rastin e publikimit të të dhënave.

“Ky cens, vlerësoi se në territorin shqiptar në datë 18 shtator 2023 janë 2 milionë e 412 mijë e 113 banorë, të cilët përbëjnë 755 mijë e 950 familje, me madhësi mesatare 3.2 anëtarë për familje, të cilët jetojnë në 1 milionë e 82 mijë e  529 banesa” deklaroi drejtuesja e Instat, Elsa Dhuli.

Nëse krahasojmë shifrat me ato të Censit 2011, rezulton se popullsia e vendit ka rreth 420 mijë  banorë më pak.

Të dhënat e detajuara të Censit do të sigurojnë jo vetëm një vëzhgim të gjendjes aktuale të popullsisë së Shqipërisë, që përfshin aspektet sociale, ekonomike, lëvizjet demografike etj por do të përmbajë  dhe të dhëna për strehimin, shëndetësinë, punësimin e të tjera.

Dhe me gjenerimin e të dhënave, pushteti vendor dhe ai qendor do të kenë mundësinë që të ndërmarrin politika konkrete dhe më të mirëorientuara, që lidhen me zhvillimin e ekonomisë, me bizneset, orientimin e masave mbështetëse si dhe ndihmës sociale dhe ekonomike.

Nga ana tjetër të dhënat do të prodhojnë edhe një diagnozë të problematikave, situatës reale social-ekonomike dhe shkaqeve të emigrimit, mbi të cilat mund të ndërmerren politika frenuese.

Ky është censi i 12-të në historinë e Shqipërisë, i cili vjen 100 vjet pas censit të parë, zhvilluar në vitin 1923.

Censi i Popullsisë dhe Banesave ka nisur më 18 shtator 2023 , një proces që është kryer nga 7500 anketues dhe u përmbyll me 15 Nëntor.

SCAN

 

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.