BE rikthen tarifat për mallrat nga Ukraina – Përfshihen disa produkte si vezët dhe sheqeri

Komisioni Europian po nxiton të rivendosë masën për kufizimin e importeve të produkteve ukrainase përmes mekanizmit të kontrollit të hyrjes së mallrave jashtë BE-së, e cila synon t’i përgjigjet protestave të forta të fermerëve të vendeve anëtare të BE-së. Në fakt muaj më parë ata e shprehën pakënaqësinë e tyre me demonstrata dhe incidente dhe këtë muaj me rritjen e votës antisistematike në zgjedhjet europiane, shkruan Financial Times.

Për sa i përket vezëve, importet e BE-së u rritën me tre të katërtat vitin e kaluar dhe vazhduan të rriten në fillim të këtij viti, me Ukrainën furnizuesin kryesor, sipas të dhënave europiane.

Industria europiane e vezëve është ankuar se fluksi i furnizimeve më të lira të Ukrainës ka penguar rimëkëmbjen e prodhimit nga shpërthimet e gripit të shpendëve në vitet e fundit.

Pak ditë më parë, Komisioni Europian njoftoi vendosjen e tarifave për importet e tërshërës nga Ukraina, pasi ato kaluan kufirin e vendosur nga europianët. Tarifat korrespondojnë me 89 euro për ton tërshërë dhe do të jenë në fuqi të paktën deri në qershor 2025.

Tarifat për vezët dhe sheqerin nga Ukraina pritet të jenë të njëjta, duke filluar nga e premtja, ndërsa këtë javë Bashkimi Europian ka hapur negociatat e anëtarësimit me Kievin. Siç thekson Financial Times, këto tarifa nxjerrin në pah se sa të vështira do të jenë këto negociata të anëtarësimit.

Ukraina është një superfuqi bujqësore që mund të prodhojë ushqim më lirë se vendet anëtare të BE-së dhe do të bëhej ende përfituesi kryesor i subvencioneve bujqësore brenda Unionit – një pozicion që aktualisht mbahet nga Franca.

Brukseli ra dakord të pezullojë të gjitha tarifat dhe kuotat për importet ushqimore të Ukrainës në qershor 2022, katër muaj pas pushtimit të urdhëruar nga Vladimir Putin, për të rritur të ardhurat e Kievit dhe për të ndihmuar furnizimet të arrijnë klientët në botën në zhvillim.

Megjithatë, brenda disa muajsh, fermerët në Poloni, Hungari, Sllovaki dhe vende të tjera fqinje u ankuan se teprica e importeve ukrainase po i nxirrte nga tregu. Këto vende vendosën embargo në mënyrë të njëanshme ndaj shumë produkteve, duke i lejuar ato të hynin vetëm për tranzit të mëtejshëm, në kundërshtim me ligjin e BE-së.

Dorina Kurtaj /SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.