Punëtorë nga Indonezia dhe Filipinet? – Rama: Hapje e misioneve diplomatike për të përfituar nga krahu i lirë i punës

Lidion Kulla/SCAN

 

Mungesa e fuqisë punëtore në vendin tonë ka bërë që shumë biznese, në mënyrë individuale t’i drejtohen vendeve të largëta si Indonezia, Bangladeshi, Filipinet apo India për të ploësuar nevojat me punonjës. Këtë e konfirmojnë edhe të dhënat e INSTAT mbi numrin e aplikimeve për leje qëndrimi në Shqipëri. Sipas shifrave zyrtare, gjatë vitit 2023, kanë aplikuar për leje qëndrimi në vendin tonë, 472 shtetas nga Filipinet dhe 726 shtetas nga Bangladeshi, në rritje të konsiderueshme krahasuar me vitin 2022. Por, tashmë shumë shpejt do të kemi edhe marrëdhënie me këto vende. Gjatë fjalës së mbajtur në Konferencën e Ambasadorëve “Tirana Diplo 2024”, kryeministri Edi Rama deklaroi se, ashtu si shumica e vendeve të Bashkimit Europian, edhe Shqipëria do të rrisë praninë e saj në këto vende, por edhe në Afrikë.

“Kemi arsye të qenësishme jo vetëm për të besuar, por edhe për të investuar në hapjen e dyerve të misioneve tona të reja, qoftë në Indonezi, për të mbuluar gjithë atë pellg atje. Me Indonezinë kemi vendosur një marrëdhënie që ka një potencial shumë të madh dhe mbi të gjitha që ka një interes shumë të madh për ne, ashtu si dhe marrëdhëniet me Filipinet, pasi të gjitha vendet e Bashkimit Europian sot, janë duke trokitur në ato dyer për forca të reja pune dhe kjo marrëdhënie shumë e rëndësishme. Dhe po ashtu, në Afrikë jemi krejtësisht të munguar dhe po unë besoj që është e drejtë që të hapim derën e parë në Kenia. Na duhet për shumë arsye, por edhe në mos për të tjera, për një arsye të thjeshtë fare që është dhe detyra që ne kemi dhe roli që ne kemi për të mbështetur formësimin përfundimtar të subjektivitetit ndërkombëtar të Kosovës.

Gjithashtu, kryeministri Rama tha se objektivi kryesor është që deri në vitin 2030, Shqipëria të jenë anëtare me të drejta të plota në Bashkimin Europian.

E dimë shumë mirë që të gjithë 2030 duhet të na gjejë në gatishmëri të plotë për t’u ulur në tryezën e BE si anëtar të barabartë të familjes europiane. Kjo është ana jonë, kjo është detyra jonë. Dimë shumë mirë që ulja në atë tryezë sa ç‘është një proces i përmbushjes së të gjitha kritereve dhe i përmbylljes së të gjitha detyrave, është dhe një proces vendimmarrjeje politike, por çka na takon ne, qoftë në aspektin politik, qoftë në aspektin teknik është 100% e qartë, ne duhet të jemi gati.

Por, përpara se të vijë kjo ditë, kryeministri tha se Shqipëria dhe vendet e tjera të rajonit duhet të përfitojnë nga Plani i Ri i rritjes për Ballkanin Perëndimor, në mënyrë që të integrohen gradualisht në hapësirën ekonomike dhe në tregun e përbashkët europian. Gjithashtu, kryeministri Rama përmendi edhe faktin që Shqipëria do të jetë mikpritëse e samitit të NATO-s në vitin 2027.

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.