Korriku, rekord importesh të pijeve dhe duhanit – Rreth 2.7 dhe 1.3 miliardë lekë, vlera më e lartë që nga viti 2005

Xhorxhina Deda/SCAN

Shifrat e tregtisë së jashtme për muajin Korrik veçojnë një sërë treguesish që kanë pësuar ndryshime interesante. Nëse analizojmë të dhënat e importit sipas kapitujve, shohim se disa prej tyre kanë shënuar rekorde, të nxitura kryesisht edhe nga ecuria mjaft pozitive e turizmit.

Mes kapitujve që kanë shënuar rritje, “Scan Intel” u ndal këtë herë kryesisht tek “Pijet, alkoolet dhe uthullat” dhe “Duhani dhe zëvëndësuesit e përpunuar të duhanit”. Nga të dhënat e “Institutit të Statistikave” mbi treguesit e tregtisë së jashtme del në pah se vlera e importeve të pijeve, alkooleve dhe uthullave gjatë muajin Korrik të këtij viti është më e larta që nga viti 2005.

Vlera e importit të pijeve arriti në rreth 2.7 miliardë lekë ose 24.2% më e lartë se i njejti muaj i vitit të kaluar. Nga shifrat e përpunuara, muaji i dytë me vlerën më të lartë të importit të pijeve është korriku i vitit të kaluar, kur llogariteshin rreth 2.2 miliardë lekë importe. Pra, Korriku i këtij viti ka arritur të thyejë rekordin e mëparshëm. Ky tregues është ndikuar kryesisht nga turizmi, por edhe nga temperaturat e larta që kanë shoqëruar muajn Korrik, duke rritur kështu kërkesën për pije.

Por si paraqiten pijet, alkoolet dhe uthullat sa i përket peshës së importeve ndër vite? Referuar të dhënave sa i përket importit të pijeve në volum, shohim se kemi të bëjmë me një tjetër rekord. Muaji Korrik i këtij viti ka regjistruar rekord edhe në volum, duke u rritur me 18%.

Nga ana tjetër, ndryshime kemi edhe sa i përket grupit të duhanit. Sipas të dhënave, ky kapitull regjistron shifrën e dytë më të lartë për muajin Korrik, që nga Janari i vitit 2005. Vlera e importit të duhanit dhe zëvëndësuesit të përpunuar të duhanit arriti në korrik një shifër prej 1.3 miliardë lekë. Nëse marrim në analizë vetëm muajin Korrik sipas viteve, importi i duhanit ka regjistruar rekord absolut këtë vit.

 

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.