Rreth 466 mld lekë kredi të dhëna për bizneset – BSH/ Numër i lartë huash për sipërmarrjet e tregtisë me shumicë dhe pakicë

Ledina Elezi/SCAN

 

Mbi 466 miliardë lekë është vlera totale e kredive të marra prej bizneseve në gjysmën e parë të vitit. Të dhënat nga Banka e Shqipërisë tregojnë një rritje të konsiderueshme të kërkesës së bizneseve për kredi krahasuar me 6 muajt e parë të vitit të shkuar, ku shuma totale e huave të miratuara nga bankat kapte shifrën 423 miliardë lekë.

Si rezultat edhe i numrit më të madh të bizneseve, por edhe nevojës e aftësisë kredimarrëse të sipërmarrjeve, Tirana, Durrësi, Vlora dhe Fieri kanë shënuar vlerën më të lartë të huave. Rreth 379 miliardë lekë është vlera e të gjithë kredive të dhëna në Tiranë, pra më shumë se gjysma e totalit të huave në të gjithë vendin.

Po cilët ishin sektorët që morën më tepër kredi?

Në të gjitha qarqet e Shqipërisë, bizneset që ushtrojnë aktivitetin e tregtisë me shumicë dhe pakicë rezultojnë me shumën më të lartë të huave të aprovuara. Vetëm në Tiranë, vlera totale e huave për këtë sektor ishte 102 miliardë lekë deri në qershor. Direkt më pas renditen kreditë e dhëna për kompanitë e ndërtimit dhe për bizneset që ushtrojnë aktivitete të lidhura me energjinë elektrike, furnizimin me gaz, avull dhe ajër të kondicionuar. Gjithashtu, edhe industria përpunuese rezulton të ketë aplikuar për një numër të lartë kredish.

Për sipërmarrjet që operojnë në fushën e ndërtimit, 65 miliardë lekë ishte vlera e huave të dhëna në qarkun e Tiranës, 1.8 miliardë lekë në qarkun e Durrësit, 1 miliardë arrin totali i huasë në qarkun e Lezhës, i cili pasohet nga Fieri me 944 milionë lekë kredi dhe Vlora me 851 milionë. Këto janë qarqet që kanë regjistruar vlerat më të larta, kjo për arsye se në këto zona janë të përqendruar edhe një numër i lartë i kompanive të ndërtimit.

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.